हामी सबैकाे संसारन्यूज

१३ चैत, काठमाडौं । नेपाल कम्युनिष्ट पार्टी (नेकपा) एमालेको माधव–झलनाथ समुहका सांसदहरु पार्टीको संसदीय बैठकमा भाग लिने भएका छन् ।

शुक्रबार कलंकीको मेगा पार्टी प्यालेसमा बसेको उक्त समूहको बैठकले संसदीय दलको बैठकमा नेता झलनाथ खनालको नेतृत्वमा सहभागी हुने निर्णय गरेको बताइएको छ ।

बैठकमा पछिल्लो परिस्थितिका बारेमा नेता नेपाल र सुरेन्द्र पाण्डेले ब्रिफिङ गरेका थिए । साथै अध्यक्ष केपी ओलीले सोधेको स्पष्टीकरणको बारेमा र ओलीले चाल्न सक्ने आगामी कदमपछि कस्तो रणनीति चाल्ने भन्ने बारेमा जानकारी गराएको बैठकमा सहभागी एक नेताले बताएका छन् ।

पार्टीभित्रै रहेर संघर्ष गर्ने समूहको निर्णय अनुसार सांसदहरुले बैठकमा भाग लिएर आफ्ना कुरा राख्ने बैठकपछि नेता रघुजी पन्तले बताएका छन् ।  त्यस्तै बैठकले पार्टी एकताको पक्षमा उभिने  निष्कर्ष पनि निकालेको छ ।

अध्यक्ष ओलीले दिउँसो तीनबजेका लागि संसदीय दलको बैठक डाकेका छन् । उक्त बैठकमा नेता नेपाल र भिम रावल भने सहभागी नहुने बताइएको छ ।