हामी सबैकाे संसारन्यूज

२९ चैत, काठमाडौँ । चेन्नाई सुपर किंग्स २०२१ को आईपिएलको आफ्नो पहिलो खेलमा दिल्ली क्यापिट्ल्ससँग ७ विकेटले पराजित भएको छ ।

टस हारेर पहिले ब्याटिङ्ग गरेको चेन्नाईले २० ओभरमा ७ विकेट गुमाएर १८८ रन बनाएका थियो । चेन्नाईका लागि सुरेश रैनाले सर्वाधिक ५४ रन बनाएका थिए । त्यसैगरी मोइन अलिले ३६ र श्याम करणले ३४ रनको विस्फोटक पारी खेलेका थिए । दिल्लीका लागि बलिङ्गमा भने क्रिस वोक्स र आवेश खानले सर्वाधिक २/२ विकेट हात पारेका थिए ।

चेन्नाईले दिएको १८९ रनको विशाल लक्ष्य दिल्लीले १८.४ ओभरमा ३ विकेट गुमाएर पुरा गर्यो । दिल्लीका लागि ओपनर शिखर धवन र पृथ्वी शहले पहिलो विकेटका लागि १३८ रनको साझेदारी निभाएका थिए । पृथ्वी शह ३८ बल खेल्दैँ ७२ रन बनाएर आउट भएका थिए भने शिखर धवन ५४ बलमा ८५ रन बनाएर आउट भएका थिए । त्यसपछि ब्याटिङ्ग गर्न आएका रिषभ पंतले १५ र मार्कश स्टोइनिसले १४ रन बनाउदैँ टिमलाई जित दिलाएका थिए । चेन्नाईका लागि बलिङ्गमा भने शादुर्ल ठाकुरले सर्वाधिक २ विकेट लिएका थिए । जितसँगै दिल्लीले पहिलो खेलबाट २ अकं जोडेको छ ।

यस खेलमा शिखर धवनले मुम्बई इन्डियन्सका कप्तान रोहित शर्मा र सनराईजर्स हैदरावादका कप्तान डेविड वार्नरलाई पछि पादैँ आईपिएलमा सर्वाधिक रन बनाउने खेलाडीको सूचिमा तेस्रो स्थानमा उक्लिएका छन । शिखर धवनले आईपिएलमा ५२८२ रन बनाएका छन ।