हामी सबैकाे संसारन्यूज

भोजपुर, २३ जेठ – मलेसियामा करिब छ वर्ष रोजगारी गरेर फर्किएका भोजपुरका लक्ष्मीप्रसाद अधिकारी व्यावसायिक कृषि कर्ममा सक्रिय बन्दै उदाहरणीय किसानका रूपमा स्थापित भएका छन्।

अरुण गाउँपालिका–७ ढुङ्गेका अधिकारीले विगत पाँच वर्षदेखि फलफूलखेतीलाई मुख्य व्यवसायका रूपमा अँगाल्दै आएका छन्। उनले अहिले २५ रोपनी क्षेत्रमा विभिन्न फलफूलका बिरुवा विस्तार गरेका छन् भने बाँकी करिब सात रोपनी जमिनमा क्रमशः खेती विस्तार गर्ने योजना रहेको बताए।

विदेशमा लिएको सीप, अनुभव र पुँजीलाई आफ्नै गाउँमा प्रयोग गर्दै कृषि पेसालाई दीर्घकालीन आम्दानीको भरपर्दो माध्यम बनाउने उनको लक्ष्य छ।

अधिकारीले लिची, आँप, अनार, कागती, एभोकाडो (घिउ फल), रुद्राक्षजस्ता बहुवर्षीय फलफूलका साथै मौसमी तरकारीखेती गर्दै आएका छन्। केही बिरुवाले उत्पादन दिन थालेको उल्लेख गर्दै उनले आगामी वर्षमा सबै बिरुवाबाट आम्दानी लिन सकिने विश्वास व्यक्त गरे।

“अहिले केही बिरुवाबाट मात्रै आम्दानी सुरु भएको छ,” अधिकारीले भने, “सबै बिरुवा उत्पादनमा आएपछि वार्षिक पाँचदेखि १० लाख रुपैयाँसम्म आम्दानी गर्ने लक्ष्य राखेको छु।”

विदेशी भूमिमा वर्षौं श्रम बेच्नुभन्दा आफ्नै गाउँमा केही गरौं भन्ने सोचले कृषिमा लागेको उनको भनाइ छ। “विदेशमा दुःख धेरै भयो। अब आफ्नै ठाउँमै केही गरेर देखाउने लक्ष्य छ,” उनले भने।

अधिकारी करिब २६ वर्ष अरूको जमिनमा बस्दै आएका थिए। अहिले आफ्नै जमिनमा व्यावसायिक खेती विस्तार गर्न पाउँदा उनी उत्साहित छन्। उनको प्रयासले स्थानीय स्तरमा कृषि पेसाप्रति आकर्षण बढ्दै गएको छ।

कृषि विस्तारसँगै उनले बाख्रापालन पनि गर्दै आएका छन्। बाख्राबाट उत्पादन हुने गोठेमाल (जैविक मल) प्रयोग गरी बोटबिरुवाको व्यवस्थापन गरिने उनले बताए। यसले उत्पादन लागत घटाउनुका साथै माटोको उर्वराशक्ति कायम राख्न सहयोग पुगेको उनको अनुभव छ।

स्थानीयस्तरमा रोजगारी सिर्जना गर्न सकिने सम्भावना देखिएको भन्दै अधिकारीले भविष्यमा खेतीलाई अझ विस्तार गर्ने योजना बनाएका छन्। आधुनिक प्रविधि, बजार व्यवस्थापन तथा प्राविधिक सेवामा राज्यले सहज पहुँच उपलब्ध गराए कृषिबाट अझ राम्रो आम्दानी लिन सकिने उनको धारणा छ।

“यदि प्राविधिक सेवा र बजार व्यवस्थापनमा सहयोग पाइयो भने कृषिमा लागेका किसानलाई धेरै सहज हुन्छ,” अधिकारीले भने।