हामी सबैकाे संसारन्यूज

काठमाडौं । गैरआवासीय नेपाली संघ (एनआरएनए) का पूर्वउपाध्यक्ष तथा ‘हजारे अभियान’ का परिकल्पनाकार डिबी क्षेत्रीले एनआरएनएमा देखिएको विवाद र संकटलाई केवल संस्थागत समस्याका रूपमा नभई नेतृत्व र अभियन्ताहरूको व्यवहारसँग पनि जोडेर हेर्नुपर्ने बताएका छन्।

लामो समयदेखि ओमानमा रेस्टुरेन्ट व्यवसायमा संलग्न तथा नेपाल कम्युनिष्ट पार्टीका केन्द्रीय सदस्यसमेत रहेका क्षेत्रीले एनआरएनएभित्रको मुख्य समस्या सहमति हुने तर त्यसको कार्यान्वयन नहुने प्रवृत्ति रहेको उल्लेख गरेका छन्।

पछिल्ला दिनहरूमा एनआरएनएका वर्तमान अध्यक्ष हेमराज शर्माले एकताको भावना र सहमतिको मर्मविपरीत काम गरिरहेको आरोप सार्वजनिक रूपमा उठ्न थालेका छन्। यसैबीच, साविक एकता महाधिवेशन आयोजक समितिका पूर्वसंयोजक, एनसीसी एकता समितिका पूर्वप्रवक्ता तथा स्टेयरिङ कमिटी सदस्य गंगाधर गौतमले पनि अध्यक्ष शर्माको कार्यशैलीप्रति असहमति जनाउँदै विज्ञप्ति जारी गरेका थिए।

यही पृष्ठभूमिमा सामाजिक सञ्जालमार्फत धारणा सार्वजनिक गर्दै क्षेत्रीले संस्थालाई सही दिशामा अघि बढाउन सबै पक्ष जिम्मेवार बन्नुपर्ने बताएका हुन्।

उनले आफू  कुनै एक राजनीतिक दलकाे नेतृत्व तहमा आबद्ध भए पनि एनआरएनएको अभियानमा सदैव समर्पित भएर काम गरेको दाबी गर्दै संस्थाको दैनिक गतिविधिमा प्रत्यक्ष हस्तक्षेप गर्नु आफ्नो भूमिका नभएको स्पष्ट पारेका छन्। तर, एनआरएनएमा भएको सहमति कार्यान्वयन नभएको विषयमा आफूलाई लक्षित गर्दै उठेका प्रश्न, गुनासा र आलोचनालाई भने सम्मानपूर्वक स्वीकार गर्ने बताएका छन्।

“सहमति भनेको दुई इमानदार पक्षबीच विश्वासका आधारमा हुने विषय हो। आफ्नो वचन आफैंले तोड्ने कार्य कुनै स्वाभिमानी र इमानदार व्यक्तिले गर्दैन भन्ने विश्वासका साथ नै सहमति गरिन्छ,” क्षेत्रीले उल्लेख गरेका छन्।

उनले कार्यसमितिले सबै पक्षलाई समेट्ने प्रयासका क्रममा अपेक्षाअनुसार निर्णय गर्न नसकेको हुन सक्ने वा केही व्यक्तिले आफूअनुकूल टोली निर्माण गर्ने प्रयास गरेको देखिएको भन्दै यस्ता विषय समाधानका लागि अझै संवाद आवश्यक रहेको बताएका छन्।

क्षेत्रीले एनआरएनएले आफ्नो विधान, उद्देश्य र जिम्मेवारीअनुसार नेपाल, नेपाली, लोकतन्त्र, मानवअधिकार तथा प्रवासी नेपालीहरूको साझा हितका पक्षमा अपेक्षाअनुसार प्रभावकारी भूमिका निर्वाह गर्न सकेको छ वा छैन भन्ने विषयमा गम्भीर आत्मसमीक्षा आवश्यक रहेको धारणा व्यक्त गरेका छन्।

उनले भनेका छन्, “समस्या संस्थामा मात्र हो कि हामी आफैं पनि संस्थाको मूल उद्देश्यबाट धेरै टाढा पुगेका छौं भन्ने विषयमा गहिरिएर सोच्ने बेला आएको छ।”

क्षेत्रीले अहिलेको परिस्थितिमा आरोप–प्रत्यारोप र विभाजनको राजनीति भन्दा सहकार्य, संवाद र आपसी विश्वासलाई प्राथमिकता दिँदै एनआरएनएलाई सही दिशामा अघि बढाउनु नै सबैको साझा दायित्व भएको बताएका छन्। साथै, विश्वभर रहेका गैरआवासीय नेपाली, एनआरएनए आईसीसी तथा राष्ट्रिय समन्वय परिषद्का पदाधिकारी, अभियन्ता र सदस्यलाई संस्थाको एकता, विश्वास र मूल उद्देश्यलाई केन्द्रमा राखेर अघि बढ्न आग्रह गरेका छन्।