हामी सबैकाे संसारन्यूज

२ बैशाख, काठमाडौं । नेकपा (एमाले) का नेता घनश्याम भुसालले प्रधानमन्त्री केपी शर्मा ओलीले अहंकार त्यागेर यसबीचमा बिगारेका कुराहरुलाई सुधार गर्न समिक्षा गरे पार्टी पुनः एक हुने बताएका छन । उनले ओलीमा चरम कुर्सी मोह रहेकोले त्यस कुरा त्यागे अझै पनि वाम गठबन्धनको सरकार बन्न सक्ने आधार रहेको बताएका छन् ।

प्रेस चौतारी रुपन्देहीले बिहीबार बुटवलमा आयोजना गरेको पत्रकार सम्मेलनमा उनले ओलीले अहंकार त्यागेर गल्ति महशुस गरे पार्टी एकहुने धारण राखे । ‘ओलीजीले अहंकार हटाउने हो भने पार्टीमा धेरै समस्या छैन’ उनले भने, ‘तर, ओलीजीका अहंकारका अगाडि पार्टीको इतिहास, गौरव, इज्जत र प्रतिष्ठा आत्मसर्मपण हुन दिँदैनौं । पार्टीभित्रै अन्तरसंघर्ष गर्छौं ।’

साथै उनले कुर्सी जोगाउनकै लागि महन्थ ठाकुर गुहार्नुको सट्टा वाम गठबन्धन जोगाउन तिर लाग्न समेत सुझाव दिए । ‘हामी वाम गठबन्धनकै सरकारको पक्षमा छौं । तर, ओलीजीले आफ्नै पार्टी बन्धक बनाएर विभाजनको बाटोमा लग्नु भयो । वाम गठबन्धनलाई बाटो खोलीदिने सट्टा महन्थ ठाकुरजीहरुलाई गुहार्न जानुभएको छ । ओलीजी वाम गठबन्धनकै विरोधी हो,’ उनले भने ।

भुसालले आफु सदैब पार्टी एकताको पक्षमा रहेकोले त्यसका लागि ब्यक्तिगत तवरबाट पनि पहल कदमी चालि रहेको बताए । ‘व्यक्तिगत हिसाबले निरन्तर छलफल गरिरहेको छु । अब पनि ओलीजीको अहंकार नसच्चिने हो भने पार्टीमात्र होइन, देश नै खतरामा पर्छ । ’