हामी सबैकाे संसारन्यूज

३ बैशाख, काठमाडौं । काठमाडौं महानगरपालिकाले बिद्यालयका शिक्षक र विद्यार्थीमा संक्रमण देखिए कम्तीमा एक हप्तासम्म विद्यालय बन्द गर्न निर्देशन दिएको छ । पछिल्लो समय कोभिड संक्रमणको दर बढ्दै जादा महानगरले पुर्ण रुपमा विद्यालय बन्दको निर्णय नगरेपनि संक्रमण पुष्टी भएमा बन्द गर्न निर्देशन दिएको हो ।

बुधबारको मेयरस्तरीय बैठकले महानगरभित्रका विद्यालयमा संक्रमण देखिए बन्द गर्न र वैकल्पिक शिक्षण बिधिबाट पठन पाठन संचालनमा ल्याउन भनेको छ । त्यसका साथै स्वास्थ्य तथा जनसंख्या मन्त्रालयबाट जारी जनस्वास्थ्यका मापदण्ड पालना गरी विद्यालय सञ्चालन गर्न पनि महानगरले अनुरोध गरेको छ ।

स्वास्थ्य तथा जनसंख्या मन्त्रालयले एक महिना शिक्षण संस्था बन्द गर्न यसअघिनै सुझावसहित सिफारिस गरेको छ । तर, हालसम्म उसको निर्देशन अनुसार सरकारले कुनैपनि निर्णय लिन सकेको छैन् । सीसीएमसी र मन्त्रिपरिषदमा उक्त सुझावबारे छलफल भए पनि निर्णय हुन सकेको छैन ।