हामी सबैकाे संसारन्यूज

१० वैशाख, काठमाडौँ । नेकपा एमालेमा छिरेपछि माओवादीबाट कार्वाहीमा परेर राष्ट्रिय सभा सदस्य पद गुमाउन पुगेका रामबहादुर थापा बादललाई सत्तारुढ नेकपा(एमाले)ले राष्ट्रिय सभा सदस्य बनाउने भएको छ ।

बालुवाटारमा बसेको दसौं महाधिवशेन आयोजक कमिटी बैठकमा सम्बोधनका क्रममा अध्यक्ष केपी शर्मा ओलीले गृहमन्त्रीसमेत रहेका नेता रामबहादुर थापालाई नै आगामी उपचुनावमा राष्ट्रिय सभा सदस्यको उम्मेदवार बनाउने जानकारी गराएका हुन् ।

जेठ ६ गते हुने राष्ट्रिय सभाको निर्वाचनमा रामबहादुर थापा नै एमालेको उम्मेदवार हुने बताउँदै उनले यसबारेमा छिट्टै निर्णय गरिनेसमेत बताएका थिए ।

अध्यक्ष ओलिले भने ‘हाम्रो पार्टीतिर लागेका कारणले माओवादीले कारबाहीको नाउमा रिक्त बनाएका पदहरु ३५ दिनदेखि ६ महिनाभित्र हुने चुनावमा पुनस् जिताएर ल्याइनेछ ।’

उनले एमालेमा लागेपछि जसरी नि संरक्षण हुने समेत बताएका थिए ।

नेकपा(माओवादी केन्द्र)बाट राष्ट्रिय सभा सदस्य बनेका थापालाई एमालेमा लागेका कारण माओवादी केन्द्रले सांसदबाट हटाएको थियो । सांसद पद खोसिएपछि रिक्त रहेको थापाको पद पूर्ति गर्न जेठ ६ गते हुने राष्ट्रिय सभाको उपनिर्वाचन हुँदैछ ।