Sansar News
वैशाख १४, काठमाडौं । स्वतन्त्र भनिएका सांसद दिपक मनाङ्गेले पनि गण्डकी प्रदेशका मुख्यमन्त्री पृथ्वीसुब्बा गुरुङको विरुद्व मत हाल्ने भएका छन् । नेपाली कांग्रेस, माओवादी केन्द्र र जनता समाजवादी पार्टी (जसपा)को गठबन्धनले दर्ता गरेको अविश्वास प्रस्तावको पक्षमा उनले मतदान गर्ने बताएका हुन् ।
सार्वजनिक सञ्चार माध्यमसँग कुराकानी गर्दै मनाङ्गेले आफुँ राष्ट्रिय जनमोर्चाले जस्तै अविश्वासको पक्षमा समर्थन जनाएको बताए । उनले एमाले नेतृत्वको सरकार असफल भएको कारण आफुँ विपक्षमा लागेको बताए ।
यसैबीच मनाङ्गेले आफुँ स्वतन्त्र सांसद भएको भन्दै बस्ने छुट्टै लहरको व्यवस्था गर्न माग गरेका छन् । उनले आफ्नो कुर्चीको लागि प्रदेश सभा सचिवालयमा निवेदन नै गरेका छन् ।
एमालेको समर्थनमा स्वतन्त्र चुनाव जितेका उनले प्रदेश सभा सदस्यको सपथ खाएसँगै एमाले प्रवेश गरेका थिए । तर नेकपा विभाजनसँगै उनी आफुँ स्वतन्त्र बताउँदै आएका छन् ।
वि.सं.२०७८ वैशाख १४ मंगलवार १३:४५ मा प्रकाशित
