हामी सबैकाे संसारन्यूज

१५ बैशाख, काठमाडौं । भारतमा तिब्ररुपमा बढी रहेको कोरोना संक्रमणका कारण त्यहाँ विभिन्न पेशामा आवद्ध रहेका नेपालीहरु पनि समस्यामा परेका छन् ।
दिल्लीको पहाडगन्जमा व्यवसाय संचालन गर्दैै आएका रामराजा होटलका मालिक नुवाकोटका हरि रैला नेपाल ल्याउने क्रममा अक्सिजनको कमिले मंगलबार मृत्यु भएको हो ।

दिल्लीको सरकारी तथा निजी अस्पतालमा अक्सिजन र बेड नपाएपछि एम्बुलेन्समा नेपाल ल्याउने क्रममा उत्तर प्रदेशको लखनउमा मृत्यु भएको दिल्लीबाट अखिल भारत नेपाली एकता मन्चका केन्द्रीय सचिव आरबी खड्काले  बताएका छन् ।

त्यस्तै बैतडीका युवा समाजसेवी मनोज भट्टलाई पनि नेपाल ल्याउने क्रममा अक्सिजनको कमीले उत्तर प्रदेशको मुरादाबाद निधन भएको खड्काले जानकारी दिएका छन् ।

‘यहाँका अस्पतालमा बेड नपाएपछि मरे पनि आफ्नो माटोमै पुगेर मर्छु भन्दै एम्बुलेन्समा हिँडेका दुई साथीको ज्यान गयो । अहिले नेपालीहरुको हालत बेहाल छ ।’ खड्काले भने ।

खड्काले भारतको स्वास्थ्य प्रणाली अस्तव्यस्त हुँदा प्रवासी नेपालीहरू अबस्था बेहाल रहेको भन्दै दुःख व्यक्त गरेका छन् । खड्काका अनु्सार पछिल्लो चरणमा भारतमा ४० जना भन्दा बढी नेपलीको निधन भइसकेको तथ्यांक छ । ‘हामीसँग भएका तथ्यांक अनुसार ४० जनाको मृत्यु भइसकेको छ ।

पछिल्लो २४ घण्टामा थप ६ जना नेपालीको मृत्यु भएको हामीलाई जानकारी आएको छ ।’ खड्काले कति नेपाली संक्रमित भएका छन् भन्ने यकिन भन्न सकिने अवस्था नै नरहेको संसारन्युजलाई बताए ।

स्थिति भयावह छ

भारतमा कोरोना महामारी तिब्र रुपमा फैलिएकोले यहाँको अवस्था अस्तव्यस्त छ । नेपालीहरुलाई कसरी बचाउने भन्नेमा लागिरहेका छौं । तर, अस्पताल पुर्याए पनि बेड र अक्सिजन नपाएका कारण धेरै नेपालीले ज्यान गुमाउनु परिरहेको छ । ज्यान गुमाउनेमा ४० वर्ष मुनिका युवाहरु धेरै छन् । पैसा भएकाले पनि उपचार गराउन पाएका छैनन् ।
हामीले कोशिष गरिरहेका छौं तर बचाउन गाह्रो परिरहेको छ । पहिलेजस्तो खान पाइएन भनेर भन्दा पनि कसरी हुन्छ हामीलाई बचाइदिनु पर्यो भनेर फोन आउने गरेको छ ।

दिल्ली, महाराष्ट्र र गुजरातका नेपालीहरु बढी प्रभावित भएका छन् । अहिले शब जलाउन पनि घण्टौं कुर्नुपर्छ । ३–४ हजारले हुनुपर्ने काममा १५ हजार सम्म लाग्ने गरेको छ । विरामीलाई कुन अस्पतालमा बेड खाली छ भनेर एक राज्यबाट अर्को राज्यमा लगेर उपचार गराउनुपर्ने स्थिति छ । एक संक्रमितको प्लाज्मा थेरापीबाट उपचार गर्नका लागि ३० जनासँग सम्पर्क गर्नुपरेको र एउटा बेडका लागि ५ ठाउँमा फोन गर्नुपरेको अवस्था छ ।