हामी सबैकाे संसारन्यूज

वैशाख १५, काठमाडौं । गण्डकी प्रदेशसभामा सरकार ढलाउने खेल सुरु भएको छ । नेपाली कांग्रेस, नेकपा (माओवादी केन्द्र) र जनता समाजवादी पार्टी (जसपा)ले मुख्यमन्त्री पृथ्वीसुब्बा गुरुङविरुद्व अविश्वासको प्रस्ताव ल्याउँदै सरकार फेरबदलको प्रयास थालेका हुन् । जसमा तीन पार्टीले तीन सांसद भएको राष्ट्रिय जनमोर्चा र स्वतन्त्र सांसद दिपक मनाङ्गेको पनि समर्थन लिएका छन् ।

सोमबारदेखि सुरु प्रदेश सभाको विशेष अधिवेशनमा अविश्वासको प्रस्तावमाथि छलफल चलिरहेको छ । अविश्वासको प्रस्तावमाथि बुधबार अथवा बिहिबारसम्म मतदान हुनसक्ने पनि सम्भावना छ ।

अविश्वासको प्रस्ताव दर्ता भएसँगै सुरु सत्ता खेलमा सांसद भड्कीने र दल परिवर्तन गर्न सक्ने पनि सम्भावना रहन्छ । यसअघि कर्णाली प्रदेशसभामा एमालेका सांसदले फ्लोर क्रस गर्दै माओवादीको सत्ता जोगाएका थिए भने लुम्बीनी प्रदेशसभामा सरकारका विरुद्व ल्याइएको अविश्वासको प्रस्तावमा हस्ताक्षर गरेका जसपाका सांसद नै मन्त्री खान गएका थिए ।

लुम्बिनी र कर्णालीमा देखिएको खेल गण्डकीमा पनि हुने सम्भावना छ । विशेषतः लुम्बिनीमा जस्तै गण्डकीमा पनि हुने त्रास दलहरुसँग देखिएको छ । जसको कारण कांग्रेस, माओवादी र जसपाले प्रदेश सांसदहरुलाई केहि दिनदेखि नै रिसोर्टमा बस्ने व्यवस्था गरेका छन् । दुई दल कांग्रेस र माओवादीले लेकसाईडस्थित कुटी रिसोर्टमा सांसदहरुलाई राखेका छन् भने जसपाले कुटी नजिकैको अन्य रिसोर्टमा राखेका छन् ।

सांसदहरुलाई रिसोर्ट सबै व्यवस्थासहित राखिएको छ । साथै रिसोर्ट नछाड्न पनि निर्देशन गरिएको छ ।

रातको १० लाख बढि खर्च

कुटी रिसोर्टको वेभसाईटअनुसार रिसोर्टमा एक रात बसेको खर्च प्रतिव्यक्ति १० हजारदेखि २० हजारसम्म छ । जहाँ व्यक्तिले गरेको अन्य खर्च पनि जोडिएको हुन्छ । विशेषतः रक्सी र अन्य मनोरञ्जनका कुरामा खर्च बढि आउने गर्दछ ।

जसका आधारमा हेर्दा सामान्य दैनिक खर्च मात्रै ५/७ लाख रुपैयाँ पर्ने देखिन्छ । साथै अन्य खर्च बढाएको खण्डमा दैनिक खर्च १० लाख जति पर्ने देखिन्छ ।

रिसोर्टमा सांसदसँगै दलका अन्य प्रतिनिधि पनि बसिरहेका छन् । कांग्रेसका केन्द्रीय नेता र माओवादी केन्द्रका केन्द्रीय नेताहरु पनि अहिले रिसोर्टमा बसिरहेका छन् । जसका आधारमा खर्च अझ बढि हुनसक्ने अनुमान गर्न सकिन्छ ।

एक/दुई जना सांसदको कारण असफल हुनसक्छ अविश्वास प्रस्ताव

गत वैशाख २ मा नेपाली कांग्रेस, नेकपा (माओवादी केन्द्र) र जनता समाजवादी पार्टी (जसपा)का २८ सांसदले हस्ताक्षर गर्दै मुख्यमन्त्रीविरुद्व अविश्वासको प्रस्ताव दर्ता गराएका थिए । अविश्वासको प्रस्तावमा २८ सांसदहरुले हस्ताक्षर गरेको भएपनि बहुमत पुर्याउन भने थप ३ सांसदको आवश्यकता पर्दछ ।

प्रदेशसभामा ३ सांसद भएको राष्ट्रिय जनमोर्चाले अविश्वासको प्रस्तावमा मतदान गर्ने बताएको छ । तर, राष्ट्रिय जनमोर्चाको केन्द्र र प्रदेश कमिटी हालको सरकारलाई समर्थन गर्ने वा समर्थन नगर्ने भन्नेमा विभाजित छ । साथै स्वतन्त्र सांसद भनिएका दिपक मनाङ्गे पनि अन्तिम समय कसलाई समर्थन गर्लान् स्पष्ट छैन् ।

हाल प्रदेशसभामा नेकपा (एमाले)को मात्रै २७ सांसद छन् । एमालेभित्र अन्तरघात नभएको खण्डमा एमालेले थप समर्थन जुटाउन सहज हुने पनि देखिन्छ ।

साथै हालको गठबन्धन कायम रहेमा र जनमोर्चाले सहयोग गरेका अविश्वासको प्रस्ताव सहज पारित हुने देखिन्छ । जनमोर्चा र स्वतन्त्र सांसदको मतबारे स्पष्ट नभईरहँदा एकातर्फ प्रस्तावक माओवादी केन्द्रभित्रै फ्लोर क्रस गराउनसक्ने डर छ भने यसअघि कर्णालीमा जस्तै विभाजित बनेको एमालेमा पनि फ्लोर क्रसको सम्भावना छ ।

जसलाई हेर्दा एक/दुई सांसदको कारण पनि सरकारविरुद्व दर्ता अविश्वासको प्रस्ताव पारित हुने/नहुनेमा अनिश्चित छ ।

सम्बन्धित समाचार

दलहरुलाई सांसद जोगाउनै मुस्किल, सबैभन्दा बढि चिन्ता राजमो र माओवादीमा