हामी सबैकाे संसारन्यूज

१९ बैशाख, काठमाडौ । दाङको तुल्सीपुरमा रोकिराखेको कारभित्र तीन बालकको शब भेटिएको छ ।

तुलसीपुर उपमहानगरपालिका वडा नं ६ को स्याउली बजारमा विगत चार महिनादेखि रोकिराखेको भारतीय नम्बर प्लेट आर जे ०१ सीसी ०८८५ नम्बरको कारभित्र तीन बालकको शब फेला परेको हो ।

शब सडेको अवस्थामा भेटिएको र उनीहरु तीनैजना बालक तुल्सीपुरका रहेको र उनीहरुको सनाखत भइसकेको जिल्ला प्रहरी कार्यालय दाङका डिएसपी मुकुन्द्र प्रसाद रिजालले संसारन्युजलाई जानकारी दिएका छन् ।

बैशाख १६ गतेदेखि हराएका ती बालकहरु तुल्सीपुर उपमहानगरपालिका ६ गाइडर भीम बहादुर परियारका १० वर्षीय छोरा, सन्देश, सन्तोष परियारका छोरा सुर्वण र किरण परियारका ७ वर्षीय छोरा करण परियार हु्न् ।

‘शबको प्रकृति हेर्दा सडिसकेको अवस्थामा देखिएको छ । उनीहरु तीनैजना बालक तुलसीपुरकै हुन् सनाखत भइसक्यो उनीहरु फरक–फरक परिवारका हुन् ।’

डिएसपी रिजालले कार भारतीय नम्बर प्लेटको भएपनि कारका मालिकलाई सोधपुछ तथा अन्य अनुसन्धानका क्रममै रहेको बताएका छन् । डिएसपी रिजालले गाडी धनी   यादव प्रसाद गैरे र चालक पदम बस्नेतलाई नियन्त्रणमा लिएर अनुसन्धान थालिएको जानकारी दिए ।