हामी सबैकाे संसारन्यूज

वैशाख ३१, काठमाडौं । बागमती प्रदेश राष्ट्रिय सभा सदस्यका उम्मेदवार डा. खिमलाल देवकोटाले आफ्नो उम्मेदवारी फिर्ता नलिने बताएका छन् । गठबन्धनको तर्फबाट उम्मेवारी दिएका उनले प्रधानमन्त्री एवं एमाले अध्यक्ष केपी शर्मा ओली र माधवकुमार नेपालबीच सहमती भएपनि फिर्ता नलिने बताएका हुन् ।

माधव कुमार नेपाल पक्षीय एमालेका नेता देवकोटा नेपाली कांग्रेस, नेकपा माओवादी केन्द्र र जसपाको समर्थन र सहयोगमा उम्मेदवार बनेका थिए । उनले उम्मेदवारी फिर्ताबारे पुनर्विचार गर्ने कुरा कल्पनाभन्दा बाहिरको भएको बताएका छन् ।

बागमतीमा एमालेको आधिकारिक उम्मेदवार भने गृहमन्त्री रामबहादुर थापा बादल छन् । उनी एमालेको आधिकारिक चुनाव चिन्ह सुर्य लिएर उठेका छन् । गठबन्धनको तर्फबाट उम्मेदवार बनेका देवकोटा कलम चिन्हमा चुनाव लड्दैछन् ।

विभाजनको डिलमा पुगेको एमालेमा भएको पछिल्लो सहमतीसँगै देवकोटाको उम्मेदवारीमाथि प्रश्न उठेको थियो ।

सामाजिक सञ्जालमार्फत स्पष्ट पार्दै उनले भनेका छन्, ‘मुलुकका प्रमुख राजनीतिक दल नेपाली काँग्रस, नेकपा (माओवादी केन्द्र) र जनता समाजवादी पार्टी लगायत अन्य दलहरुको समर्थन र सहयोगबाट मैले उम्मेदवारी दिएको स्थितीमा यसमा पुर्नविचार गर्ने कुरा कल्पना भन्दा वाहिरको विषय हो । निष्ठा र ईमान्दारिताको राजनीति प्रति मेरो गहिरो लगाव छ । राजनीतिक दलहरुले म प्रति गर्नुभएको विश्वाश र भरोसाप्रति उच्च सम्मान व्यक्त गर्दछु । संविधानप्रदत स्थानीय र प्रदेशका अधिकारहरु विना व्यवधान कार्यान्वयन हुनुपर्दछ भन्ने मान्यतामा म दृढ छु । मेरो उम्मेदवारी पनि यही विचारबाट अभिप्रेरित छ । ’