हामी सबैकाे संसारन्यूज

जेठ २०, काठमाडौं । माधवकुमार नेपाल पक्षधर नेकपा (एमाले)का १७ वटा भातृ संगठनहरुले पार्टी र जनसंगठनहरुका सबै संरचनालाई साबिककै अवस्थामा फर्काउन माग गरेका छन् । बिहिबार १७ जनसंगठनका प्रमुखहरुले संयुक्त वक्तव्य जारी गर्दै फागुन २८ यता एकपक्षीय रुपमा गरिएका निर्णयहरु फिर्ता लिन माग गरे ।

पार्टी अध्यक्ष केपी शर्मा ओलीले नवौँ महाधिवेशनबाट निर्वाचित नेतृत्व विघटन गर्दै पार्टी र कम्युनिष्ट आन्दोलनलाई बिसर्जन तिर लगेको भन्दै उनीहरुले आपत्ति जनाएका छन् । भातृ संगठनहरुले सबै एकपक्षीय निर्णय तत्कालै फिर्ता लिन पनि माग गरेका छन् ।

‘पार्टीको नवौं राष्ट्रिय महाधिवेशनको मार्गनिर्देशन र पार्टी विधानको विपरीत बनेको अवैध कमिटी र अध्यक्षले गरेको यो कारबाही आफैंमा अर्थहीन छ । यस प्रकारको स्वेच्छाचारी निर्णयको हामी भर्त्सना गर्दछौं । तत्काल फिर्ता लिन माग गर्दछौं’, विज्ञप्तिमा उल्लेख छ ।

निर्णय नसच्याए पार्टी अलग बनाउने चेतावनी उनीहरुको छ । ‘जनताको लामो र कठोर संघर्षबाट प्राप्त उपलब्धिहरुको रक्षाको निम्ति, गौरवमय इतिहास बोकेको पार्टी र आन्दोलनको रक्षाको निम्ति पार्टीलाई नयाँ शिराबाट एकताबद्ध गरेर क्रान्तिको नयाँ झन्डा उठाउनुपर्नेछ । इतिहासको यो आदेश र आवश्यकताका निम्ति नयाँ प्रतिवद्धता र दृढताका साथ उभिन हामी तयार रहेको पनि जानकारी गराउन चाहन्छौं’, विज्ञप्तिमा भनिएको छ ।

यस्तो छ विज्ञप्ती