Sansar News
२३ जेठ, काठमाडौं । मेलम्ची खानेपानी विकास समितिले नदी क्षेत्रमा सावधानी अपनाउन आग्रह गरेको छ ।
यहि असार एक गतेदेखि मेलम्ची खानेपानीको सुरुङको परीक्षण सफाई गर्न लागिएको हुँदा सुरुङ खाली गर्नेक्रममा बागमती नदी, मेलम्ची नदी, सिन्धु खोला, र ग्याल्थुम खोलामा नियन्त्रित रुपमा पानी छाडिने भएकोले खोला वरपर सावधानी अपनाउन अपील गरेको हो ।
एक सूचना जारी गर्दै पानी छोड्दा पानीको बहाब बढ्ने हुँदा सो क्षेत्रमा जाँदा विशेष सावधानी अपनाउन सर्वसाधारण सवैलाई अनुरोध गरिएको छ ।
करिब दुई हप्तामा सुरुङ खाली हुने र त्यस पछि सुरुङ निरीक्षण र सुधारको काम गरिने जनाइएकाे छ । मेलम्ची नदीमा पुरानै अवस्थामा पानी बहने भएकोले नदीको पानीमा आधारित पेशा व्यावसाय सञ्चालन गर्ने सवैलाई पनि आवश्यक सावधानी अपनाउन समितिले अनुरोध गरेको छ ।
सुरुङको परीक्षण सफाइको काम काठमाडौंमा खानेपानी वितरण सुरु गर्नुअघि नै गर्नुपर्ने भएपनि तत्काल उद्घाटनका लागि हतारो गर्दा सुरुङ परीक्षण विनै सञ्चालन गरिएको थियो । चिनियाँ निर्माण कम्पनी सिनो हाइड्रोसँग ठेक्का सम्झौता हुँदा कार्यविधिमा सुरुङमा पानी भरेर फेरि खाली गराएर निरीक्षण गर्ने उल्लेख थियो ।
वि.सं.२०७८ जेठ २३ आइतवार २०:२७ मा प्रकाशित
