Sansar News
२५ जेठ, काठमाडौं । आजदेखि उपत्यका लगायतका विभिन्न जिल्लामा कोरोना भाइरसविरुद्धको भेरोसेल खोप लगाइदैछ ।
स्वास्थ्य तथा जनसंख्या मन्त्रालयलका अनुसार उक्त खोप उपत्यकामा ६०, ६१, ६२, ६३ र ६४ वर्ष उमेर समुह र जिल्लामा ६२, ६३ र ६४ वर्ष उमेर समुहलाई लगाइदैछ ।
मन्त्रालयका अनुसार काठमाडौं उपत्यकामा पहिलो डोज भेरोसेल लगाएका र दोस्रो डोज लगाउने बेला काठमाडौं बाहिर भएकाहरुले पनि यो खोप लगाउन पाउनेछन् ।
त्यस्तै यसअघि खोप लगाउन छुटेका स्वास्थ्यकर्मी, मेडिकल कलेजका विद्यार्थी तथा इन्टर्नहरुले पनि खोप लगाउन पाउनेछन् ।
त्यसैगरी तिब्बतसँग सिमाना जोडिएका जिल्लाका पालिकाहरुमा १८ वर्ष माथिका सबै व्यक्तिहरुले यो खोप लगाउन पाउनेछन् भने हिमाली जिल्लाहरुमा यसअघिको ५५ वर्ष माथिकाको खोप कार्यक्रममा लगाउन छुटेका व्यक्तिहरुले पनि खोप लगाउन पाउनेछन् ।
नागरिकता नभए पनि खोप लगाउन पाइन्छ
स्वास्थ्य तथा जनसंख्या मन्त्रालयले नागरिकता नभए पनि खोप लगाउन पाइने बताएको छ । मन्त्रालयका अनुसार नागरिकता नहुनेहरुले आफ्नो नाम, उमेर र ठेगाना स्पष्ट हुने कुनै सरकारी कागजात तथा त्यो पनि छैन भने आफू बस्ने वडा कार्यालयलाई आफ्नो कागजात नभएको जनकारी गराएपछि वडाले दिएको सिफारिस लिएर खोप लगाउन पाइने बताइएको छ ।
वि.सं.२०७८ जेठ २५ मंगलवार ०८:५८ मा प्रकाशित
