हामी सबैकाे संसारन्यूज

जेठ २८, काठमाडौं । पूर्वप्रधानमन्त्री एवं जनता समाजवादी पार्टी (जसपा)का नेता डा. बाबुराम भट्टराईले प्रधानमन्त्री केपी शर्मा ओली व्यवस्था नै सिध्याउने डिजाइनमा लागेको आरोप लगाएका छन् । शुक्रबार सभामुख अग्निप्रसाद सापकोटाले आयोजना गरेको सर्वदलीय बैठकपछि सञ्चारकर्मीहरुसँग प्रतिक्रिया दिँदै उनले यस्तो आरोप लगाएका हुन् ।

उनले ओली सरकार चुनावको पक्षमा नरहेको पनि आरोप लगाए । चुनाव घोषणा गरेको सरकार मन्त्रिपरिषद पुनर्गठन र अध्यादेश जारी गर्ने दिशातिर नजाने उनको भनाई छ ।

‘सरकारले चुनाव घोषणा गरेको छ तर, चुनाव गर्ने यसको नियत छैन, चुनाव गर्न चाहेको भए यसरी मन्त्रिपरिषद् पुनर्गठन गर्ने र अध्यादेश जारी गर्दैन’, उनले भनेका छन् ।

उनले ओली निकै सहज ढंगले व्यवस्था सिध्याउने दिशामा लागेको बताए । उनका अनुसार चुनाव नगराउने र व्यवस्था सिध्याउने डिजाइन सुरु भएको छ ।

उनले भनेका छन्, ‘सरकारले ६ महिनाभित्र चुनाव गर्ने कुनै लक्षण छैन । चुनाव नभएपछि संविधान फेल हुन्छ । भ्याकुम पैदा हुन्छ । यसरी संकट सिर्जना गरेर अन्ततः संविधान र व्यवस्था नै फेल गर्ने ग्राण्ड डिजाइन हो ।’