हामी सबैकाे संसारन्यूज

असार १७, काठमाडौं । प्रधानन्यायाधीश चोलेन्द्र शम्शेर राणाले कांग्रेस सभापति शेरबहादुर देउवाले प्रधानमन्त्रीमा गरेको दाबी कसरी गलत भयो भनि प्रश्न गरेका छन् । बिहीबारको संवैधानिक इजलासमा एमाले नेता तथा वरिष्ठ अधिवक्ता अग्नि खरोललाई उनले यस्तो प्रश्न गरेका हुन् ।

अधिवक्ता खरेलले प्रतिनिधिसभा विघटन र राष्ट्रपति विद्यादेवी भण्डारीले प्रधानमन्त्री नियुक्त नगर्नु सही रहेको तर्क गर्दा राणाले संविधानको धारा ७६ को उपधारा ५ बमोजिम देउवाले कांग्रेस, माओवादी र अन्य सांसदको समर्थन लगेको भन्दै कसरी गलत हुन्छ भनि प्रश्न गरेका थिए ।

उनले दलबाटै समर्थन चाहियो कि सांसदको समर्थन भनि प्रश्न गरेका थिए । ‘प्रतिनिधिसभामा दलको मात्र उपस्थिति हुँदैन, अन्य उपस्थिति पनि संविधानले स्विकारेको छ । त्यस कारण संविधानको धारा ७६ को उपधारा ५ र २ को दल र स्वतन्त्रको समर्थन भनेर व्याख्या भइरहेको छ, अलि प्रस्ट गरिदिनुस् है’, खरेललाई प्रधानन्यायाधीश राणाले सोधे, ‘दलबाटै चाहियो कि अरूबाट पनि समर्थन हुन सक्छ ? शेरबहादुर देउवाले दाबी गर्दा पार्टी, अन्य सांसदसहित १ सय ४९ जनाको हस्ताक्षर लिएर दाबी गर्न जानुभयो, यसमा शेरबहादुर देउवाले के गल्ती गर्नुभयो ?’

उनले देउवालाई दुई पार्टीको समर्थन रहेको र अन्य स्वतन्त्र रुपमा गएको बताएका थिए । राणाले भने, ‘देउवाको हकमा दुई पार्टीको समर्थन भयो, अरू स्वतन्त्र रूपमा गए ।’

धारा ७६ को उपधारा ५ स्वतन्त्र हाे कि हाेइन् ?

प्रधानन्यायाधीश राणाले संविधानको धारा ७६ को उपधारा ५ स्वतन्त्र हो कि होइन् भनि प्रश्न गरेका छन् । अधिवक्ता खरेललाई उनले स्वतन्त्र हो भने किन २ अनुसार व्याख्या गरियो भनि प्रश्न गरे ।

प्रधानन्यायाधीशले भने, ‘संविधानका सबै धारा स्वतन्त्र हुन्छन्, धारा ७६ को उपधारा ५ पनि स्वतन्त्र हो, संसारमा नभएको व्यवस्था हो भनेर दुवै पक्षले भनिरहेका छन्, स्वतन्त्र धारा हो भनिरहेका बेला यसमा अन्य ऐन जोडेर हुन्छ ?’

अधिवक्ता खरेलले भने धारा ७६ को उपधारा २ मा दलको समर्थन लिनुपर्ने भनेको तर उपधारा ५ मा स्वतन्त्र समर्थन गर्न पाईन्छ भनेर नलेखिएको बताएका छन् । उनका अनुसार धारा ७६ का उपधारा २ र ५ जोडिएर आउँछन् ।