हामी सबैकाे संसारन्यूज

२४ असार, काठमाडौं । मनसुनी वायुको प्रभावका कारण देशैभरी हल्का मध्यम देखि भारी वर्षाको सम्भावना रहेको छ ।

मौसम पूर्वानुमान महाशाखाका अनुसार आज दिउँसो प्रदेश १, प्रदेश २, बागमती प्रदेश, गण्डकी प्रदेश र लुम्बिनी प्रदेशका धेरै स्थानहरुमा तथा कर्णाली र सुदूरपश्चिम प्रदेशका थोरै स्थानहरुमा हल्का देखि मध्यम वर्षाको सम्भावना रहेको छ ।

त्यस्तै प्रदेश १, प्रदेश २, बाग्मती प्रदेश, गण्डकी प्रदेश र लुम्बिनी प्रदेशका केहि स्थानहरुमा मेघ गर्जन/ चट्याङ्ग सहित भारी वर्षाको सम्भावना रहेको छ । बागमती प्रदेश, गण्डकी प्रदेश र लुम्बिनी प्रदेशका एक वा दुई स्थानहरुमा धेरै भारी वर्षाको पनि सम्भावना रहेको छ ।

त्यस्तै राति पनि देशका धेरै स्थानहरुमा हल्कादेखि मध्यम वर्षाको सम्भावना रहेको छ भने लुम्बिनी, सुदुरपश्चिम प्रदेश र बागमती प्रदेशका थोरै स्थानहरुमा मेघ गर्जन/ चट्याङ्ग सहित भारी वर्षाको सम्भावना रहेको छ । साथै सुदुर पश्चिम प्रदेशका एक वा दुई स्थानहरुमा धेरै भारी वर्षाको सम्भावना रहेको पनि महाशाखाले जनाएको छ ।
यी नदीको वहाव उच्च हुने
जल तथा मौसम विज्ञान विभागले आज बिहान रुद्रवेणी नदीले सर्तकता तह पार गरेको र बढ्दो क्रममा रहेकोले नदी तटीय क्षेत्रमा दिउँसो सम्म सतर्कता अपनाउन अनुरोध गरेको छ । साथै दुधकोशी, रबुबजार, तमोर माझिटार, चितवन जिल्लाको माडी क्षेत्रको छरछरे लगायत आसपासका क्षेत्रमा भारी बर्षा भएको र थप हुनसक्ने हुँदा खहरेखोलामा आकस्मिक बाढी जानसक्ने, नदी तटिय क्षेत्र र डुबान हुने क्षेत्रमा उच्च सतर्कता अपनाउन अनुरोध गरिएको छ ।

नवलपुर जिल्लाको अरुङग र देध गाँउ आसपासको क्षेत्रमा पनि भारी वर्षा भएको र थप वर्षा हुनसक्ने हुनाले सो क्षेत्रका ससाना नदीहरूमा आकस्मिक बहाव आउन सक्ने, तटीय क्षेत्र तथा पहिरोग्रस्त क्षेत्रमा सतर्कता अपनाउन अनुरोध गरिएको छ ।

त्यस्तै सुर्खेतको खानीखोला र आसपासको क्षेत्र तथा तनहुँको बिमलनगर, बन्दीपुर र आसपासका क्षेत्रहरूमा पछिल्लो ३ घण्टामा भारी वर्षा भएको र थप वर्षा हुनसक्ने, सो क्षेत्रका ससाना नदीहरूमा आकस्मिक बहाव आउन सक्ने हुनाले तटीय क्षेत्र तथा पहिरोग्रस्त क्षेत्रमा हुनेहरूले उच्च सतर्कता अपनाउन अनुरोध गरिएको छ ।