हामी सबैकाे संसारन्यूज

असार २५, काठमाडौं । निर्वाचन आयोगमा अहिले अनौठो निवेदन परेको छ । माओवादी केन्द्र छाडेर एमाले प्रवेश गरेका केहि नेताहरुले त्यस्तो अनौठो निवेदन दिएका हुन् । उनीहरुले आफुँले छाडेको पार्टी अवैधानिक भएको भन्दै खारेज हुनुपर्ने माग राखेका छन् ।

अधिवक्ता सरोज बढुथोकीमार्फत असार २३ मा आयोगमा परेको निवेदनमा उनीहरुले गत २०६९ माघदेखि हालसम्म महाधिवेशन नभएको हुँदा माओवादी केन्द्र भन्ने दल अवैधानिक भएको बताएका छन् । पार्टी परिवर्तन गरेपनि अवैध रहेको कारण आफुँहरुमाथि माओवादी केन्द्रले कारबाही गर्न नमिल्ने पनि उनीहरुको जिकिर छ ।

बुधबार दर्ता गरिएको निवेदनमाथि कारबाही प्रक्रिया तत्काल बढाउन भन्दै उनीहरु शुक्रबार दबाब दिनकै लागि निर्वाचन आयोग पुगेका थिए । एमालेका पूर्वमाओवादी समूहका नेताहरु टोपबहादुर रायमाझी, मणि थापा, प्रभु साह, गौरीशंकर थारुलगायत आयोग पुगेका थिए ।

आयोग पुगेका नेता टोपबहादुर रायमाझीले आफुँहरु वैधानिक जनप्रतिनिधि भएको बताउँदै अवैधानिक माओवादी केन्द्रले कारबाही गर्न नमिल्ने जिकिर गरे । उनले माओवादी केन्द्रलाई तत्कालै खारेज गर्नुपर्ने पनि माग दाेहाेर्‍याए ।

उनले भनेका छन्, ‘राजनीतिक दलसम्बन्धी ऐनमा प्रत्येक ५ वर्षमा महाधिवेशन गर्नुपर्ने भनेको छ । उसले आफ्नो अद्यावधिक गर्न सकिरहेको छैन । त्यस्तो अवैधानिक पार्टीले वैधानिक जनप्रतिनिधिलाई कारबाही गरियो । संघीय सांसद, प्रदेश सांसद, स्थानीय तहका जनप्रतिनिधि, जनताबाट प्रत्यक्ष चुनिएका वैधानिक जनप्रतिनिधिलाई अवैधानिक पार्टीले कारबाही गर्ने ? माओवादी केन्द्र नै कानूनसम्मत नभएको हुनाले त्यसलाई कारबाही, खारेज गर्नुपर्छ ।’

प्रचण्डसँग बदला लिन आयोगको प्रयोग

सर्वोच्च अदालतले जेठ ६ मा गरेको फैसलासँगै एमालेभित्रका पूर्वमाओवादी नेताहरु समस्यामा छन् । उनीहरु एमालेभित्र चलिरहेको ‘जेठ २’ को बहसले पनि थप प्रताडित देखिएका छन् ।

मन्त्रीबाट पदमुक्त भएलगत्तै उनीहरुमध्ये केहिले माओवादी केन्द्रमा फर्किने सुरसार पनि कसेका थिए । तर, उनीहरुको सुरसारलाई माओवादी केन्द्रका अध्यक्ष पुष्पकमल दाहाल ‘प्रचण्ड’ले भने सिधै अस्वीकार गरिदिएका थिए ।

मन्त्रीबाट पदमुक्त भएलगत्तै उनीहरुमध्ये केहिले माओवादी केन्द्रमा फर्किने सुरसार पनि कसेका थिए । तर, उनीहरुको सुरसारलाई माओवादी केन्द्रका अध्यक्ष पुष्पकमल दाहाल ‘प्रचण्ड’ले भने सिधै अस्वीकार गरिदिएका थिए ।

माओवादी फर्किन गरेको अनुरोधको नालेबेली सार्वजनिक भएसँगै नेता टोपबहादुर रायमाझीले गत जेठ २४ मा विज्ञप्ती नै निकालेर आफ्नो बचाउ गरेका थिए । उनले आफुँ एमाले नै भएको भन्दै माओवादी नफर्किने बताएका थिए ।

तर, एमालेभित्र प्रताडित भईरहेको अवस्था र माओवादी केन्द्रले प्रस्तावलाई अस्वीकार गरेसँगै आक्रोशित बनेका उनीहरुले माओवादी केन्द्रमाथि भने अनौठो रिस पोखेका छन् । निर्वाचन आयोगको इतिहासमै नभएको शैलीमा उनीहरुले दल दर्ता खारेजीको माग गरेका छन् ।

प्रचण्ड निकटस्थ एक नेताका अनुसार उपाय नभेटेपछि उनीहरुले यस्तो कदम चालेका हुन् । प्रचण्डविरुद्व आक्रोश निर्वाचन आयोगमार्फत पोखेको उनको भनाई छ ।

‘उहाँहरु एमालेभित्र समस्यामा हुनुहुन्छ, मन्त्री पद गुमेसँगै के गर्ने अन्यौंल छ, निकै अवसरवादी देखिनुभएका उहाँहरुलाई प्रचण्डले ल्याउने विषयमा समर्थन दिनुभएन’, उनले भनेका छन्, ‘अहिले प्रचण्डमाथिको रिस आयोगमा पोख्नुभएको छ । यस्ता नक्कली कुरा टिक्दैन् ।’

सम्बन्धित समाचार

टोपबहादुरको अनुरोध प्रचण्डले अस्वीकार गरेपछि…

यस्तो छ माओवादी केन्द्र खारेजीको माग गर्दै आयोगमा परेको निवेदन