हामी सबैकाे संसारन्यूज

२८ असार, काठमाठौँ । नेपाली कांग्रेसका सभापति शेरबहादुर देउवाको नेतृत्वमा मंगलबार गठबन्धन सरकार बनाइने भएको छ ।

सर्वोच्च अदालतको निर्णयपछि बसेको विपक्षी गठबन्धनकाे बैठकले मंगलबार देउवाको नेतृत्वमा सानो आकारमा गठबन्धन सरकार बनाउने निर्णय गरेको हो ।

नेकपा एमालेका वरिष्ठ नेता माधवकुमार नेपालको निवास कोटेश्वरमा बसेको उक्त बैठकले सर्वाेच्च अदालतको आदेशअनुसार मंगलबार नै गठबन्धन सरकार बनाउने निर्णय गरेको हो ।

गठबन्धनको बैठकले मंगलबार देउवाको नेतृत्वमा सानो मन्त्रिपरिषद् बनाइने र पछि थप गर्दै जाने बैठकले निष्कर्ष निकालेको नेपाली कांग्रेसका प्रमुख सचेतक बालकृष्ण खाँणले जानकारी दिएका छन् । उनका अनुसार भोलि(मंगलबार) बिहान फेरि शीर्ष नेताको बैठक बस्नेछ ।

संसद पुनस्र्थापना गरेको सर्वोच्च अदालतले भोलि(मंगलबार) साँझ ५ बजेसम्म देउवालाई प्रधानमन्त्री बनाउन परमादेश दिएको छ । सर्वोच्चले गरेको परमादेशमा २ दिनभित्र देउवालाई प्रधानमन्त्री नियुक्त गर्न र ७ दिनभित्र प्रतिनिधि सभा बोलाउन भनिएको छ ।

गठबन्धनमा नेपाली काँग्रेस, नेकपा(माओवादी केन्द्र), नेकपा एमाले माधव पक्ष, जनता समाजवादी पार्टी (जसपा) र राष्ट्रिय जनमोर्चा रहेका छन् ।

गठबन्धनमा रहेका माधव कुमार नेपालले भने आफूहरुको मिशन पुरा भएको भन्दै अब विपक्षी गठबन्धनमा नरहने बताएका छन् ।

विपक्षी गठबन्धनले काँग्रेस सभापति देउवालाई प्रधानमन्त्रीको उम्मेदवार बनाएर १४६ जनाको हस्ताक्षरसहित राष्ट्रपति कार्यालयमा बुझाएको थियो । तर राष्ट्रपतिले प्रधानमन्त्रीको सिफारिसमा संसद विघटन गर्ने निर्णय गरेकी थिइन् ।  प्रतिनिधिसभा पुर्नस्थापनाको माग राख्दै कांग्रेस सभापति शेरबहादुर देउवासँगै १४६ सांसदलगायतले सर्वोच्च अदालतमा रिट दर्ता गराएका थिए। त्यहि  मुद्धामा सर्वोच्चले आज परमादेश जारी गरेको हो ।

माधव नेपालद्वारा मिशन पुरा भएको भन्दै गठबन्धनमा नरहने संकेत