हामी सबैकाे संसारन्यूज

असार ३१, काठमाडौं । नेकपा (एमाले)का अध्यक्ष एवं संसदीय दलका नेता केपी शर्मा ओलीले बोलाएको संसदीय दलको बैठकमा वरिष्ठ नेता माधवकुमार नेपाल पक्ष नजाने भएको छ ।

एमालेका केन्द्रीय सदस्य एवं सांसद विरोध खतिवडाले आफ्नो पक्ष बैठकमा नजाने निर्णयमा पुगेको जानकारी दिए । संसार न्यूजसँग कुराकानी गर्दै उनले दुई पक्षबीच समझदारी नभई बोलाईने कुनै पनि बैठकमा आफ्नो पक्ष उपस्थित नहुने निर्णय भएको बताए ।

‘समझदारी नभई बोलाईने बैठकमा हामी सहभागी हुँदैनौं’, खतिवडाले भने, ‘भोली बोलाइएको बैठक पनि उहाँहरुको आफ्नो बैठक हो, हामी जाँदैनौं ।’

पुनःस्थापित प्रतिनिधि सभामा एमालेको भूमिकाबारे छलफल गर्न ओलीले शुक्रबार संसदीय दलको बैठक बोलाएका छन् । उनले माधव पक्षीय सांसदलाई पनि बैठकमा उपस्थितिको लागि निम्तो पठाएका छन् ।

तर, माधव पक्षले सबै विषयमा समझदारी नभई ओलीले बोलाएका कुनै पनि बैठकमा नजाने यसअघि नै निर्णय गरेको थियो ।

सम्बन्धित समाचार

ओलीले बोलाए एमाले संसदीय दलको बैठक, माधव पक्षलाई पनि निम्तो