हामी सबैकाे संसारन्यूज

साउन १, काठमाडौं । नेकपा (एमाले)को स्थायी समिति बैठकले पार्टी विवाद समाधान गर्न गठित कार्यदल विघटन गर्ने निर्णय गरेको छ । शुक्रबार पार्टी वरिष्ठ नेता माधवकुमार नेपाल पक्षको सहभागीता बिनै तुलसीलाल प्रतिष्ठान, च्यासलमा बसेको बैठकले यस्तो निर्णय गरेको हो ।

एमालेका प्रवक्ता प्रदिप ज्ञवालीका अनुसार बैठकले १० बुँदे प्रस्तावलाई ग्रहण गर्दै सिर्जनशील रुपमा कार्यान्वयन गर्ने पनि निर्णय गरेको छ ।

‘पार्टीमा विद्यमान समस्या समाधानसम्बन्धमा सुझाब दिन गठित कार्यदलले तयार गरि बैठक समक्ष प्रस्तुत गरेको प्रस्ताव अनुमोदन गर्ने निर्णय गरिएको छ, प्रस्तावलाई सिर्जनात्मक र रचनात्मक रुपले कार्यान्वयन गर्ने निर्णय गरिएको छ’, बैठकका निर्णय सुनाउँदै प्रवक्ता ज्ञवालीले भने, ‘कार्यदलले आफ्नो जिम्मेवारी पुरा गरेकोमा कार्यदलमा रहनुभएका कमरेडहरुलाई धन्यवाद दिँदै कार्यदल विघटन गर्ने निर्णय गरिएको छ ।’

एमाले विवाद उत्कर्षमा पुगेको बेला गत जेठ २ मा दुवै पक्षका ५/५ जना सदस्य रहने गरि कार्यदल गठन गरिएको थियो । तर, कार्यदल गठन भएपश्चात पार्टी अध्यक्ष केपी शर्मा ओलीले एक पक्षीय निर्णय गर्न थालेपछि कार्यदल निष्क्रिय बनेको थियो । दोस्रो संसद विघटनसँगै एमाले कार्यदल भंग जस्तो थियो ।

तर, प्रतिनिधि सभा विघटनविरुद्व सर्वोच्चमा सुनुवाई सकिएको दिन असार २१ मा कार्यदल पुनः सक्रिय भएको थियो । नाटकीय रुपमा सक्रिय भएको कार्यदलले असार २७ को मध्यरात १० बुँदे सहमति गरेको थियो । कार्यदलले गरेको सहमतिप्रति स्वंय माधवकुमार नेपाल भने सहमत छैनन् । उनले लगत्तै १० बुँदेका केहि सहमतिप्रति प्रश्न उठाउँदै आफ्नो अहसमति व्यक्त गरेका थिए ।

एमाले विवाद कायम रहेको र दोस्रो तहका नेताहरु विवाद समाधानको कोशिस गरिरहेकै बेला कार्यदलसमेत विघटन गरिनुलाई अर्थपूर्णं रुपमा लिइएको छ । कार्यदल विघटन गर्ने ओली पक्षको निर्णयले एमाले विवाद थप गम्भिर अवस्थामा गएको देखिन्छ ।

सम्बन्धित समाचार

एमालेको स्थायी समिति बैठक, यस्ता छन् बैठकका मुख्य ४ निर्णय

बैठक स्थलबाट बाहिरियो माधव पक्ष, भीम रावल भन्छन् – ओलीजीबाट प्रस्ताव ठाडै अस्वीकार भयो