Sansar News
साउन ५, काठमाडौं । नेकपा (एमाले)का वरिष्ठ नेता माधवकुमार नेपाल पक्षीय सांसदहरुको बैठक बस्ने भएको छ । माधव पक्षीय सांसद मेटमणि चौधरीले बताएअनुसार बानेश्वरस्थित अर्याल होटलमा दिउँसो ४ बजे बैठक बस्न लागेको हो ।
बैठकमा आगामी कदमबारे छलफल हुने उनले बताए । उनका अनुसार पार्टी अध्यक्ष केपी शर्मा ओली पक्षले सोधेको स्पष्टीकरणबारे पनि बैठकले निर्णय लिनेछ ।
सोमबार बसेको एमाले केन्द्रीय समिति बैठकले माधवकुमार नेपालसहित २२ सांसदलाई २४ घण्टे स्पष्टीकरण सोध्ने निर्णय गरेको थियो । तर, माधव पक्षले प्रारम्भिक रुपमै स्पष्टीकरण नदिने बताएको थियो ।
माधव पक्षले स्पष्टीकरणका नदिएको आधारमा कारबाही गर्न खोजीए अदालतमा मुद्दा हाल्ने पनि चेतावनी दिएको छ । बताइएअनुसार स्पष्टीकरणसहित अन्य विषयमा बैठकले निर्णय लिनेछ ।
मंगलबार मात्रै सरकारमा सहभागिताको विषयमा माओवादी केन्द्र अध्यक्ष पुष्पकमल दाहाल प्रचण्ड र जनता समाजवादी पार्टी (जसपा)का अध्यक्ष उपेन्द्र यादवले नेता माधव नेपाललाई भेटेका थिए । नेता नेपालसँगको भेटपछि प्रचण्डले प्रधानमन्त्री शेरबहादुर देउवालाई भेटेर सरकार सञ्चालनका विषयमा केहि महत्वपूर्णं सहमतिसमेत गरेका छन् ।
प्रचण्डले नेता माधव नेपालले दिएको सुझाबका आधारमा पनि देउवासँग सहमति गरेको बुझिएको छ ।
वि.सं.२०७८ साउन ५ मंगलवार १४:२० मा प्रकाशित
