Sansar News
साउन १४, काठमाडौं । नेकपा (एमाले)का उपाध्यक्ष भीम रावलले नेता माधव कुमार नेपाल पक्ष सरकारमा सहभागी नहुने बताएका छन् । एमाले विवाद समाधान गर्न गठित कार्यदलका सदस्यसमेत रहेका उनले नेता माधव नेपाल पार्टी एकताकै लागि भए पनि सरकारमा नजाने विश्वास देखाए ।
कार्यदलले दिएको १० बुँदे प्रतिवेदन माधव नेपालकै सहमतिमा तयार भएको उनको भनाई छ । प्राइम टाइम नामक टेलिभिजनसँगको कुराकानीमा उनले छिट्टै एमाले एकताले पूर्णं पाउने बताए ।
उनका अनुसार माधव नेपाल एकताको पक्षमा नभएको भनेर आएका चर्चा व्यर्थका हल्ला भएको बताए ।
‘पार्टी विधि र प्रक्रियाअनुसार चल्नुपर्छ भन्ने हाम्रो माग हो, अहिले सहमति पनि सोही दिशातिरै भईरहेको छ, बाँकी कुरा मिलाउने तिर हामी लागेका छौं’, उनले भनेका छन्, ‘सबै कुरा छिट्टै समाधान हुन्छ, माधव जी हल्ला भएजस्तो सरकारमा जानुहुन्न ।’
वि.सं.२०७८ साउन १४ बिहीवार १३:२२ मा प्रकाशित
