हामी सबैकाे संसारन्यूज

साउन २०, काठमाडौं । लुम्बिनी प्रदेशकी सांसद विमला खत्री (वली) माओवादी केन्द्रको सम्र्पकमा पुगेकी छिन् । बुधबार उनले आफुँ माओवादी केन्द्रमै रहेको र एमालेमा नगएको भन्दै माओवादी केन्द्रका प्रदेश संसदीय दलका नेता कुलप्रसाद केसी ‘सोनाम’लाई फोन र म्यासेज गरेकी हुन् ।

माओवादी केन्द्रका प्रदेश सभा सदस्य इन्द्रप्रसाद खरेलले वली सम्पर्कमा आएको र छिट्टै पत्रकार सम्मेलन गरि जानकारी दिने तयारी गरेको बताए । हराएको दिनदेखि नै आफुँ शंकर पोखरेलको मन्त्री क्वाटरमा बन्धक अवस्थामा रहेको कुरा वलीले बताएको सांसद खरेलले जानकारी दिए ।

‘उहाँ सम्पर्कमा आउनुभएको छ, उहाँलाई जबरजस्ती बन्धक बनाइएको कुरा उहाँले जानकारी गराउनुभएको छ’ संसार न्यूजसँग खरेलले भनेका छन्, ‘हामी छिट्टै पत्रकार सम्मेलन गरेर वलीजीको वास्तविकताबारे जानकारी दिन्छौं ।’

उनले मुख्यमन्त्री शंकर पोखरलविरुद्व अपहरणको मुद्दा लगाउने तयारीमा आफुँहरु रहेको बताए । उनले भने, ‘वली जीले हालसम्म आफुँलाई बन्धक बनाई राखिएको कुरा बताउनु भएको छ, त्यो पनि पोखरेलको क्वाटरमा, हामी पोखरेलविरुद्व मुद्दा दर्ताको तयारीमा पनि छौं ।’

सर्वोच्च अदालतको फैसलासँगै एमाले र माओवादी केन्द्र ब्यूँतिएपछि वलीले पत्रकार सम्मेलन नै गरेर माओवादी केन्द्र रोजेकी थिइन् । तर, लुम्बिनीमा सत्ता परिवर्तनको खेल सुरु भएसँगै अचानक उनको नामबाट एमालेमै फर्किएको विज्ञप्ति सार्वजनिक भएको थियो ।

तर माओवादी केन्द्रले भने वलीको उक्त विज्ञप्तीलाई शंकास्पद भएको बताएको थियो । केन्द्रले वलीलाई सार्वजनिक गरिनुपर्ने पनि बताईरहेको थियो ।