Sansar News
साउन २१, काठमाडौं । नेकपा (एमाले)को माधवकुमार नेपाल पक्षको केन्द्रीय कमिटीको बैठक आज बस्ने भएको छ । माधव पक्षीय नेतृ अष्टलक्ष्मी शाक्यका अनुसार बुद्धनगरस्थित क्वालिटी ब्यांक्वेटमा बैठक बस्न लागेको हो ।
केन्द्रीय समिति बैठकमा प्रस्तुत गरिने एजेण्डाका विषय निर्णय लिन अहिले माधव पक्षका स्थायी समिति सदस्यहरु भेला भएका छन् । जनाइएअनुसार स्थायी समिति बैठक लगत्तै केन्द्रीय समिति बैठक बस्नेछ ।
केन्द्रीय समिति बैठकले एमाले एकताका विषयमा ठोस निर्णय लिने नेतृ शाक्य बताइन् । उनका अनुसार सबै नेताहरुको राय सुनेपश्चात नै बैठकले निर्णय लिनेछ ।
माधव पक्षमा धेरै नेताहरु पार्टी विभाजन गरेरै अगाडि बढ्नुपर्ने लाइनमा छन् । ओली पक्षले पनि आजको बैठकले विभाजनको तयारीको रुपमा विश्लेषण गरेको छ ।
वि.सं.२०७८ साउन २१ बिहीवार १२:०१ मा प्रकाशित
