Sansar News
२१ साउन, मोरङ । प्रहरी जवान पदका परीक्षामा सहभागी नक्कली परीक्षार्थी सहित ६ जना पक्राउ पक्राउ परेका छन् ।
१ नम्बर प्रदेश प्रहरी तालिम केन्द्र रानी विराटनगरमा संचालित प्रहरी जवान पदको परीक्षामा सहभागी नक्कली परिक्षार्थी सहित ६ जनालाई प्रहरीले पक्राउ गरेको छ ।
पक्राउ पर्नेहरुमा भोजपुर पौवादुङ्मा गाउँपालिका–६ का सूर्य राई, सागर राई, संगम राई, धनकुटा साँगुरीगढी गाउँपालिका–८ का सरोज राई, राज कुमार राई र धनकुटा शहिदभूमि गाउँपालिका–३ का खपाङ राई रहेका छन् ।
प्रारम्भिक अनुसन्धानको क्रममा सूर्य राईले प्रहरी जवान पदमा नयाँ भर्ना गराई दिन्छु भनि संगम राईबाट नगद १ लाख १८ हजार रपैयाँ, सागर राईबाट नगद १ लाख १८ हजार रुपैयाँ र सरोज राईबाट नगद २ लाख रुपैयाँ लिएको खुल्न आएकोले उक्त कार्यमा संलग्न ६ जनालाई १ नम्बर प्रदेश प्रहरी तालीम केन्द्र रानी विराटनगरले पक्राउ गरेको हो ।
उनीहरु उपर शिक्षा ऐन, २०२८ को दफा १७ को १ (क) बमोजिम परीक्षा सम्बन्धी कसूरमा जिल्ला प्रशासन कार्यालय मोरङबाट ५ दिन म्याद लिई थप अनुसन्धान कार्य भइरहेको जिल्ला प्रहरी कार्यालय मोरङले जनाएको छ ।
वि.सं.२०७८ साउन २१ बिहीवार १७:१५ मा प्रकाशित
