हामी सबैकाे संसारन्यूज

भदौ २, काठमाडौं । माधवकुमार नेपाल नेतृत्वको समूहले नयाँ दल दर्ता गर्ने भएको छ । जसका लागि माधव समूह छलफलमा जुटेको छ ।

अध्यादेश आएसँगै दल दर्ता गर्ने तयारी गरेको समूह राष्ट्रपति विद्यादेवी भण्डारीले जारी गरेलगत्तै आयोग जान छलफलमा जुटेको हो । अहिले बानेश्वरस्थित अर्याल होटेलमा माधव पक्षका केन्द्रीय सदस्य र सांसदहरु भेला भएका छन् ।

नेता मेटमणि चौधरीले बताएअनुसार छलफललगत्तै माधव समूह आयोगमा जानेछ । उनका अनुसार पार्टीको नाम, चुनाव चिन्ह र विधानलगायतका कुराहरु तयार भईसकेका छन् ।

माधव पक्षले पार्टीको नाम नेकपा एमाले (समाजवादी) राख्ने निर्णय गरेको छ ।

जारी अध्यादेशमा पार्टीको केन्द्रीय सदस्य वा सांसद २० प्रतिशत भए पुग्ने व्यवस्था छ । अध्यादेशसँगै माधव पक्षलाई नयाँ दल दर्ताका लागि केन्द्रीय सदस्य वा सांसदको संख्या पुग्ने देखिन्छ ।

चौधरीले जनाएअनुसार नयाँ दल दर्ताको लागि ५७ जना केन्द्रीय सदस्य र २५ जना सांसदले हस्ताक्षर गरेका छन् । सो संख्या दल दर्ताको लागि पर्याप्त संख्या हो ।