हामी सबैकाे संसारन्यूज

३ भदौ, बुटवल । लुम्बिनी प्रदेशसभा सदस्य विमला कुमारी खत्री (वली) राजनीतिक प्रतिशोध साँधेर फसाउन खोजिएको बताएकी छन् । आफूलाई राजनीतिक प्रतिशोध साँधेर फसाउन खोज्ने झुण्डले आफ्नो फोटोलाई फोटोसपबाट मिलाएर चरित्र हत्या गर्ने दुस्प्रयास भएको बताएकी हुन् ।

बुधबार आफ्नो फेसबुक वालमा विज्ञप्ति पोष्ट गर्दै विमलाले भनेकी छन् ‘हिजो एकाएक सामाजिक सञ्जालमा मेरो फोटोलाई फोटोसपबाट मिलाएर जुन किसिमले चरित्र हत्या गर्ने दुस्प्रयास गरियो यसको म कडाभन्दा कडा निन्दा गर्न चाहान्छु’ उक्त घटनामा आफू सम्बन्धित नभएको प्रष्ट पार्दै उनले भनेकी छन्, ‘एकाएक मेरो फोटो जोडेर आउँदा म आफैं आश्चर्यचकित भएकी छु । म यो घटनामा सम्बन्धित छैन र जानकार पनि छैन ।’

आफ्नो चरित्रमाथि दाग लाग्ने गरी ‘साइबर स्याल’हरुबाट चरित्र हत्याको दुस्प्रयास भएको भन्दै उनले यसमा संलग्नमाथि कारवाहीको माग गरेकी छन् ।

प्रदेश सभाको निर्वाचनमा दाङ क्षेत्र नं ३(२)बाट तत्कालिन नेकपाबाट निर्वाचित भएकी उनले पछि आफूले माओवादी पार्टी रोजेकी थिइन । आफूलाई एमालेमै रहन पटक–पटक दबाब दिइएको भएपनि आफू प्रतिबद्ध भएर माओवादी केन्द्रमै रहेपछि एमालेको साइबर सेनाबाट यसरी चरित्र हत्या गर्न खोजिएको उनको भनाइ छ ।

‘माओवादी केन्द्र रोजेपछि केही तत्वहरुबाट ममाथि पटक–पटक आक्रमण गर्ने प्रत्यत्न गरिरहेका थिए, मुख्यमन्त्री कार्यालयमा एक हप्ता बन्धक बन्नु पनि त्यसैको उपज थियो । अहिले पनि पटक–पटक मलाई पार्टी परित्याग गर्न दवाब आइरहेको थियो । तर, म आफ्नो पार्टीप्रति प्रतिबद्ध हुँदा मेरो राजनीतिक जीवनलाई धरापमा पार्ने दुस्प्रयास स्वरुप नै मेरो चरित्र हत्या गर्न खोजिएको हो । यसमा कोही पनि भ्रममा नपर्न अनुरोध गर्दछु’ विज्ञप्तिमा उनले लेखेकी छन् ।

विमलाले वाईसीएल कार्यकर्ता एकराज बस्नेतको गालामा चुम्बन गरेको फोटो सामाजिक सन्जालमा आएपछि उनले स्पष्टीकरण दिएकी हुन् ।