Sansar News
भदौ ८, काठमाडौं । नेकपा (एकीकृत समाजवादी)का अध्यक्ष माधवकुमार नेपालले बागमती प्रदेशकी मुख्यमन्त्री अष्टलक्ष्मी शाक्य आफ्नै योजना र सल्लाहमा मुख्यमन्त्री बनेको बताएका छन् । मंगलबार पार्टी बैठकपछि चन्द्रागिरीमा आयोजित पत्रकार सम्मेलनमा बोल्दै उनले यस्तो बताएका हुन् ।
‘उहाँ (अष्टलक्ष्मी शाक्य) मेरै चाहना र सुझावअनुसार मुख्यमन्त्रीमा जानुभएको हो। तर उहाँ पनि अप्ठेरोमा हुनुहुन्छ’, नेता नेपालले भने ।
पत्रकार सम्मेलनमा नेता नेपालले कुन पार्टी रोज्ने भन्ने कुरा शाक्यमै निर्भर रहेको बताए । कानुनी प्रक्रियाअनुसार २१ दिनभित्र पार्टी रोज्नुपर्ने भएकोले शाक्य अप्ठ्यारोमा रहेको नेता नेपालकाे भनाइ छ ।
‘२१ दिनभित्र रोज्न पाउने व्यवस्था अनुसार त्यो समयभित्र कता रोज्नुहुन्छ, त्यसका आधारमा त्यो सरकारलाई हेर्ने दृष्टिकोण बन्छ’, नेपालले भने ।
माधव पक्षले नयाँ दल दर्ता गर्न निर्वाचन आयोगमा निवेदन दिँदै गर्दा शाक्य बागमतीको मुख्ममन्त्रीमा नियुक्त भएकी थिइन् । माधव पक्षमा रहेर पार्टी अध्यक्ष केपी शर्मा ओलीको चर्को आलोचक देखिएकी शाक्य अन्तिम समय भने एकता पक्षमा उभिएकी थिइन् ।
वि.सं.२०७८ भदौ ८ मंगलवार १३:४६ मा प्रकाशित
