हामी सबैकाे संसारन्यूज

भदौ ९, काठमाडौं । माधवकुमार नेपाल नेतृत्वमा दल दर्ताका लागि निर्वाचन आयोगमा दिएको निवेदनमाथि सनाखत सुरु भएको छ । आयोगमा नेताहरु पुगेसँगै सनाखत सुरु भएको हो ।

माधव पक्षले सुरु सनाखतमा नेकपा (एकीकृत समाजवादी)को पक्षमा ३१ सांसद र ६५ केन्द्रीय सदस्य उपस्थित भएको दाबी गरेको छ । सांसद निरादेवी जैरुका अनुसार संख्या सनाखतको क्रममा केहि थप हुनसक्ने बताइन् ।

दिल्लीमा उपचाररत नेता झलनाथ खनालले पनि वारेसमार्फत आफ्नो समर्थन पठाएका छन् । यसअघि दल दर्ताका लागि निवेदन दिँदा एमालेका २०३ सदस्यीय कमिटीका ५७ जनाले हस्ताक्षर गरेका थिए ।

राजनीतिक दलसम्बन्धी अध्यादेशअनुसार दल विभाजनका लागि संसदीद दल वा केन्द्रीय समितिमा २० प्रतिशतको समर्थन चाहिन्छ । सो व्यवस्थाअनुसार दाबी गरिएबमोजिम माधव नेपाल नेतृत्वको पार्टीमा दुवै तर्फ २० प्रतिशत पुग्ने देखिन्छ ।

अहिले आयोगमा एकिकृत समाजवादीको पक्षमा देखिएका सांसद र केन्द्रीय सदस्यहरुको लाइन फरक–फरक गरि सनाखत सुरु गरिएको छ ।