हामी सबैकाे संसारन्यूज

भदौ ९, काठमाडौं । नेकपा (एमाले)का अध्यक्ष केपी शर्मा ओलीले सभामुख अग्निप्रसाद सापकोटामाथि आक्रोश पोखेका छन् । १४ सांसदलाई गरिएको कारबाहीको सूचना टाँस्न रोकेर न्यायाधिश बनेको भन्दै उनले आक्रोश पोखेका हुन् ।

ओलीले माओवादी केन्द्रले टोपबहादुर रायमाझीलगायतमाथि गरेको कारबाहीबारेको सूचना तत्काल टाँस्ने सभामुखले एमालेको सन्दर्भमा विभेद गरेको बताए । उनले एमालेले गरेको कारबाहीको सूचना टाँस्नुपर्नेमा दाँत टाल्न हिँडेको भन्दै आक्रोश पोखे ।

‘प्रचण्डले आदेश दिँदा टोपबहादुर रायमाझीजीहरुमाथि हतार–हतार कारवाही गरेको सुनाउनुभो तर, एमालेले गरेको कारवाही गरेको नौ दिनसम्म कार्यान्वयन गर्नुभएको छैन, हिजो त उहाँ दाँत टाल्न जानुभएको थियो’, पत्रकार सम्मेलनमा ओलीले भनेका छन् ।

उनले १४ सांसदमाथि गरिएको कारबाही पार्टी जोगाउनका निम्ति थियो भन्दै सभामुखले पार्टी फुटाउन भूमिका खेलेको आरोप लगाए । उनले सभामुख सापकोटालाई राम्रोसँग दाँत टालियोस् भन्दै शुभकामना पनि दिएका छन् ।

‘हामीले कारवाही गर्नुको उद्देश्य पार्टी फुट रोक्नु थियो, १४ जनालाई निस्काशन गरेको भए उहाँहरुको संख्या पुग्दैनथ्यो र पार्टी फुट्दैन थियो’, ओलीले भनेका छन्, ‘तर, एमाले फुटाउनकै लागि कारवाहीको सूचना नटाँसेर सभामुखले पक्षधरता देखाइरहनुभएको छ, सूचना टाँस्नुहोला भनेको दाँत टाल्न हिँड्नुभयो, उहाँको दाँत राम्रोसँग टालियोस्, शुभकामना छ !’

सम्बन्धित समाचार

माधव पक्षमा लागेका नेताहरुलाई ओलीको आग्रह : मुल घरमा फर्कनुस्, पूर्वाग्रह राख्दिन !