हामी सबैकाे संसारन्यूज

भदौ ९, काठमाडौं । नेकपा (एमाले)का अध्यक्ष केपी शर्मा ओलीले माधवकुमार नेपाल पक्ष तर्फ उभिएका नेताहरुलाई एमालेमै फर्कन आग्रह गरेका छन् । बुधबार च्यासलमा पत्रकार सम्मेलन गर्दै उनले यस्तो आग्रह गरेका हुन् ।

पत्रकार सम्मेलनमा ओलीद्धारा जारी वक्तव्यमा एमालेमा फर्किने नेताहरुलाई कुनै पूर्वाग्रह नराखिने बताइएको छ । ओलीले विभाजनबाट कसैको हित नहुने कुरा नेताहरुलाई सम्झाएका छन् ।

‘तपाईँहरु मूल घरमा फर्किनुस्, यसअघिका कामको आधारमा तपाईँहरुप्रति मैंले कुनै पूर्वाग्रह राख्दिन’, ओलीले वक्तव्यमा भनेका छन्, ‘विभाजनबाट फाईदा कसैको हुँदैन् ।’

ओलीले अध्यादेश ल्याउने सरकारको कार्य घृणित भएको भन्दै विरोध जनाएका छन् । उनले अध्यादेश ल्याएर प्रधानमन्त्री शेरबहादुर देउवाले अनैतिक कार्य गरेको आरोप लगाए ।