हामी सबैकाे संसारन्यूज

हिरा भट्ट ‘बदमास नम्बर दुई’
पञ्चेश्वर-६, बैतडी

निस्के बाघ बनेर जो पसलमा पस्दा बिराला थिए
खै के पो वरदान तीर्थ सरिका भट्टीहरूले दिए
आलो इज्जत सान मान पदवी ऐश्वर्य सारा मिसी
काका नित्य बटार्दछन् सहरमा जिब्रो बटार्ने सिसी
|१|

जिब्रो स्नान सदैव शुद्ध जलले सानो खुसीले छुँदा
जिब्रो आचमनीय दर्द पलमा दर्केर दु:खी हुँदा
ए फर् एप्पलका लुला र लँगडा शब्दार्थ थोरै मिसी
काका नित्य बटार्दछन् सहरमा जिब्रो बटार्ने सिसी
|२|

निम्तो दिन्छ निवासमा सुँगुर झन् स्वीकारियो निर्भय
साक्षी स्वागतमा सधैं कुकुर छन् साझा छ शौचालय
बाआमा दुलही स्वयंसित सबै छोरा र छोरी मिसी
काका नित्य बटार्दछन् सहरमा जिब्रो बटार्ने सिसी
| ३|

पास्नी गर्छ विवाह गर्दछ सिसी हुन्छन् सिसीका बुढी
बच्चा पाउँछ भोज गर्दछ सिसी बोक्छन् सिसीले भुँडी
सीसीसी सिसिसी सिसी सिसिसिसी सीसीसिसी सीसिसी
काका नित्य बटार्दछन् सहरमा जिब्रो बटार्ने सिसी
|४|

के भन्थ्यौ भन शब्दकोश पहिले काका र काकी गने?
“थोरै भेद थियो परन्तु अहिले पर्यायवाची बने”
काकीका करका कमाल चखना बस्छन् सिलौटा पिसी
काका नित्य बटार्दछन् सहरमा जिब्रो बटार्ने सिसी
|५|

छन्द : शार्दूलविक्रीडित
गण : म – स – ज – स – त – त – गु
सङ्केत : SSS – IIS – ISI – IIS – SSI – SSI – S