Sansar News
१३ भदौ, काठमाडौँ । नेपाल लाइफ इन्स्योरेन्स कम्पनी लि. र नेशनल मर्चेन्ट बैंकर बीच समझदारी भएको छ ।
नेपाल लाइफले नेशनल मर्चेन्ट बैंकर लि. को ५१% संस्थापक शेयर खरिद गर्ने गरी समझदारी पत्रमा हस्ताक्षर गरेको हो । नेपाल लाइफले काठमाडौंमा आयोजित एक कार्यक्रममा नेपाल लाइफकोतर्फबाट प्रमुख कार्यकारी अधिकृत सन्तोष प्रसाईं र नेशनल मर्चेन्ट बैंकरको तर्फबाट प्रमुख कार्यकारी अधिकृत नविन बास्कोटाले समझदारी पत्रमा हस्ताक्षर गरेका हुन् । नेपाल लाइफले उक्त शेयर खरिद गरेपछि सो कम्पनीको जारी एवं चुक्ता पूँजी रु. ३० करोड हुनेछ ।
कार्यक्रममा दुबै कम्पनीका संचालक समितिका अध्यक्षहरु र सदस्यहरुको उपस्थित रहेको थियो । साे अवसरमा नेपाल लाइफकाे तर्फबाट नायब महाप्रबन्धक अमित कयालले नेपाल लाइफले आफ्नो लगानी इन्भेष्टमेन्ट बैंक र कम्पनीमा गर्न पाएकोमा खुसी व्यक्त गरे । नेशनल मर्चेन्ट बैंकका प्रमुख कार्यकारी अधिकृत नबिन बास्कोटाले नेपाल लाइफको व्यवस्थापनलाई धन्यवाद दिँदै आगामी दिनमा नेपाल धितोपत्र बोर्डबाट जारी गरिने अन्य इजाजतहरु पनि लिएर भरोसापूर्ण एवं बलिया बैंकको रुपमा काम गर्दै जाने बताए ।
कार्यक्रमलाई सम्बोधन गर्दै नेपाल लाइफका प्रमुख कार्यकारी अधिकृत सन्तोष प्रसाईंले नेपाल लाइफ नेपालकाे जीवन बीमा क्षेत्रमा सवैको विश्वास जितेर उत्कृष्ठ ब्राण्ड रहन सफल भएको बताए । उनले अब नेशनल मर्चेन्ट बैंकरलाई पनि नेपालको पूँजीबजारमा सफल कम्पनीको रुपमा स्थापित गरिने बताए ।
वि.सं.२०७८ भदौ १३ आइतवार १६:३८ मा प्रकाशित
