हामी सबैकाे संसारन्यूज

१५ भदौ, काठमाडौं । बरिष्ठ पत्रकार देवप्रकाश त्रिपाठीको नेतृत्वमा नयाँ पार्टी घोषणा भएको छ ।

सोमवार एक कार्यक्रमकाबीच पत्रकार त्रिपाठीको नेतृत्वमा ‘एकिकृत शक्ति नेपाल’ नामक नयाँ पार्टीको घोषणा गरिएको हो । उक्त पार्टीमा अध्यक्ष त्रिपाठीको नेतृत्वमा १५ पदाधिकारी र २४ सदस्य रहेको बताइएको छ ।

अध्यक्ष त्रिपाठीले राष्ट्रियता कमजोर हुँदै गएको सार्वभौमिक सर्वोच्चता र राष्ट्रिय अखण्डताको रक्षा हुन नसकेको अवस्थामा हिन्दू धर्म सापेक्ष, राजसंस्था र मौलिक नीतिको एजेण्डासहित नयाँ पार्टी घोषणा गरिएको बताएका छन् ।

अध्यक्ष त्रिपाठीले जनताको समूह, तटस्थ समुह र स्वतन्त्र धारणा बनाउने समुहहरु धेरै कमजोर भइसकेको बताउँदै यो अवस्थामा नेपाली माटोको ढुकढुकी जे छ त्यो सबैले मुटुमा राख्ने र मुटुमा जे छ त्यसलाई शब्दबाट बाहिर प्रस्तुत गर्न आग्रह गरे ।

‘हामीले हाम्रो ऐजेण्डा जे बनाएका छौं, त्यो कुनै बाहिरबाट आयात गरिएको त्यो कुनै माक्स र लेनिन, गान्धि, माओत्सेतुङ नामका व्यक्तिले यो देश बनाउन योगदान दिएका थिए भन्ने मलाई लाग्दैन,’ नयाँ पार्टी घोषणा गर्दै अध्यक्ष त्रिपाठीले भने, ‘उहाँहरुलाई स्मरण गर्ने आफ्नो ठाउँहरु होलान् तर नेपालको सवलीकरणका लागि उहाँहरुलाई हामीले सम्झिरहनु पर्दैन ।’

उनले नेपालको सबै धर्मलाई संरक्षण गर्ने हिन्दूराष्ट्रको परिकल्पना गरेको र त्यो ऐजेन्डाका लागि आफूहरु अगाडि बढेको बताए ।
नयाँ पार्टीको घोषणापछि पार्टीका उपाध्यक्ष रामप्रसाद उप्रेतीसहित कार्यसमितिका पदाधिकारीहरु भद्रकाली मन्दिरमा पुगेर सपथ लिएको बताइएको छ ।