हामी सबैकाे संसारन्यूज

१६ भदौ, काठमाडौं । नेकपा (माओवादी केन्द्र)को भातृ संगठन योङ कम्युनिष्ट लिग (वाईसीएल) को राष्ट्रिय भेलाले २ सय ३१ सदस्यीय केन्द्रीय समिति चयन गरेको छ।

भाद्र १२ देखि १५ गतेसम्म भर्चुअलरुपमा सम्पन्न भेलाले विवादका कारण नेतृत्व चयन गर्न नसकेपछि विना नेतृत्व २३१ सदस्यीय केन्द्रिय समिति घोषणा गरेको हो । केन्द्रीय कमिटीमा तीनजनाले अध्यक्ष पदमा दाबी गरेपछि अध्यक्ष विनाको केन्द्रीय कमिटी गठन गरिएको हो ।

राष्ट्रिय भेलामा अध्यक्ष पदका लागि सुबोध शेर्पाली, सुमन देवकोटा र यशोदा न्यौपानेले दावी गरेका थिए । तर सहमती जुटाउन नसकेपछि केन्द्रीय समितिले नै पदाधिकारी चयन गर्नेगरी नयाँ केन्द्रीय कार्य समिति राष्ट्रिय भेलाले चयन गरेको हो।

सो भेलाले अध्यक्षसहितका पदाधिकारीको चयन गर्ने जिम्मेवारी नयाँ केन्द्रीय समितिलाई नै दिएको छ । वाइसीयलका इञ्चार्ज रामप्रसाद सापकोटा ‘दिपशीखा’ले केन्द्रीय समितिको बैठकले पदाधिकारी चयन गर्ने गरी केन्द्रीय समितिका सदस्यहरु चयन गरिएको जानकारी दिए।

नयाँ केन्द्रिय समितिमा २३ जना भने पछि मनोनित हुनेछन्। वाइसियलको विधानमा १० प्रतिशत सदस्य पछि मनोनित गर्ने व्यवस्था गरिएकाले २३१ जनामध्ये २३ जना पछि मनोनित हुनेछन्। अबको एक सातामा वाईसीएलको केन्द्रीय कमिटीको बैठक बस्ने र पदाधिकारीहरु चुन्ने तयारी छ