हामी सबैकाे संसारन्यूज

१७ भदौ, दाङ । दाङमा खोलाले कार बगाउँदा कारमा सवार चारजनाको मृत्यु भएको छ ।

घोराही उपमहानगरपालिका वडा नं ४ मा रहेको सिस्ने खोलामा आएको बाढीले ३–०१–२४ च ४४४० नम्बरको कार बुधवार राति  बगाउँदा कारमा सवार चारजनाको मृत्यु भएको र चालक गम्भीर घाईते भएको जिल्ला प्रहरी कार्यालय दाङले जनाएको छ ।

बाढीले कार बगाउँदा कारमा सवार घोराही उपमहानगर १३ की ४० वर्षीया रितामाया पुन, सोही ठाउँकी ३५ वर्षीया सुशीला श्रेष्ठ, घोराही १५ की ३३ वर्षीया राधा कुँवर र सोही ठाउँकी ४३ वर्षीया बिमला केसीको मृत्यु भएको जिल्ला प्रहरी कार्यालय दाङका प्रहरी उपरीक्षक सुरेश काफ्लेले जानकारी दिएका छन् ।

त्यस्तै घोराही १३ का ४३ वर्षीय नरबहादुर पुन गम्भीर घाईते भएका छन् । कारले बगाएर मृत्यु भएकाहरुको शब घोराही १७ को भेलभार भन्ने ठाउँमा फेला परेको पनि प्रहरीले जनाएको छ । उनीहरुको शब पोष्टमार्टमका लागि घोराहीमा राखिएको बताइएको छ ।

कारमा सवार उनीहरु सबै नेपालगन्जमा सपिङ गरेर घर फर्कने क्रममा बाढीमा परेका थिए ।