हामी सबैकाे संसारन्यूज

भदौ २४, काठमाडौं । बुधबार पार्टीको भातृ संगठन वाईसीएलको कार्यक्रमलाई सम्बोधन गर्ने क्रममा माओवादी केन्द्रका अध्यक्ष पुष्पकमल दाहाल ‘प्रचण्ड’ले एमसीसीलाई प्रयोग गरेर सत्ता गठबन्धन फुटाउन खोजिएको टिप्पणी गरेका थिए । उनले एमसीसी राजनीतिक विषयका रुपमा अगाडि आएको बताएका थिए ।

‘प्रतिगमन परास्त गर्न बनेको गठबन्धनलाई एमसीसी प्रयोग गरेर फुटाउन सकिन्छ कि भनेर एकथरी लागिराखेका छन्’, प्रचण्डले भनेका थिए, ‘एमसीसी, आईपीएसलाई अगाडि सारिदियो भने यिनीहरुभित्र झगडा पर्ला कि भनेका छन् । हामीले यो बुझिराख्न जरुरी छ ।’

प्रचण्डले प्रधानमन्त्री एवं कांग्रेस सभापति शेरबहादुर देउवा र प्रमुख प्रतिपक्षी दलका नेता केपी शर्मा ओलीबीच सुरु भएको संवादलाई शंकाको रुपमा पनि लिएका थिए ।

• एमसीसीप्रतिको लगाव
• तुईन प्रकरण र हेलिकोप्टर प्रकरणमा मौनता
• न्यूनतम साझा कार्यक्रमप्रति वेवास्ता
• चीनसँगको सीमा विवादबारे छानबिन थाल्नु
• सरकारको कामलाई वेवास्था, पार्टी महाधिवेशनमा सक्रियता

अहिले एमसीसी एउटा कारणको रुपमा देखिएपनि सत्तारुढ गठबन्धनमा प्रधानमन्त्री देउवाका अन्य कदमका कारण पनि आशंका र अविश्वास बढेको देखिन्छ । देउवाले एमसीसी पास गराउन सत्तारुढ गठबन्धन होइन् विपक्षीसँग मोर्चा बनाउन खोजेको छन् ।

त्यस्तै देउवाले जयसिंह धामी वेपत्ता भएको तुइन प्रकरणमा अस्वभाविक मौनता देखाएका छन् भने बझाङमा भारतीय पक्षले गरेको हेलिकोप्टर गस्तीलाई वेवास्ता गरेका छन् । जसप्रति सत्तारुढ गठबन्धनका अन्य दलको आपत्ति छ ।

गठबन्धनले तयार पारेको साझा न्यूनतम कार्यक्रमअनुसार नभई नयाँ–नयाँ इश्यूलाई देउवाले अगाडि बढाउन खोजेको देखिन्छ । देउवाले यसअघिकै सरकारले समाधान गरिएको भनिएको चीनसँगको सीमा विवादलाई पुनः समिति नै बनाएर अगाडि बढाउन खोजेका छन् । जसप्रति गठबन्धनभित्र तिव्र असन्तुष्टी व्यक्त भएको देखिन्छ ।

देउवा पछिल्लो समय सरकारको कामभन्दा पार्टी महाधिवेशन केन्द्रीत देखिएका छन् । मन्त्रिपरिषद् विस्तार हुन ढिलाई भईरहेको सन्दर्भमा देखिएको असन्तुष्टीलाई समाधान गर्नेभन्दा पार्टीको आन्तरिक विषय मिलाउन उनको व्यस्तता देखिएको छ । सरकारको गतिविधिप्रति उनको भूमिका कमजोर देखिँदा थप गठबन्धनका नेताहरु अन्यौंलमा परेका छन् ।