Sansar News
काठमाडौं । काठमाडौंको कीर्तिपुर नगरपालिकास्थित ट्याङ्लाफाँटमा गुडिरहेको एक निजी कारमा अचानक आगलागी हुँदा चालकको जलेर मृत्यु भएको छ । मङ्गलवार ट्याङ्लाफाँटको चाँदनी चोक नजिकै बा ५ च ३०३८ नम्बरको किया कारमा आगलागी भएको हो ।
कारमा एक्कासि आगो लागेपछि चालक बाहिर निस्कन नपाएकाले गाडीभित्रै मृत फेला परेका जिल्ला प्रहरी परिसर काठमाडौंले जनाएको छ । उनलाई सिट बेल्ट बाँधेको अवस्थामै जलेको र मृत अवस्थामा फेला पारिएको प्रहरीले जनाएको छ । मृतक चालकको सनाखत हुन बाँकी छ ।
घटनाको जानकारी पाएलगत्तै स्थानीय बासिन्दा र प्रहरीले फायर एक्स्टिङ्गुइसर (आगो निभाउने उपकरण०)को प्रयोग गरी आगो निभाउने प्रयास गरेका थिए । पछि घटनास्थलमा दमकल समेत पुगेको थियो । गाडीमा कसरी आगो लाग्यो भन्ने विषयमा प्रहरीले अनुसन्धान गरिरहेको छ ।
वि.सं.२०८३ साउन ५ मंगलवार १६:०८ मा प्रकाशित
