Sansar News
४ भदौ, काठमाडौं । नेकपा एकीकृत समाजवादीका अध्यक्ष माधवकुमार नेपालसँग पनि अमेरिकी सहयोग परियोजना मिलेनियम च्यालेन्ज कर्पोरेसन (एमसीसी)की उपाध्यक्ष फतिमा सुमारले भेट गरेकी छन् ।
बिहीबार काठमाडौं आएकी सुमारसहितको टोलीले एकीकृत समाजवादीको संसदीय दलको कार्यालय सिंहदरबारमा अध्यक्ष नेपालसहित नेताहरु प्रमेश हमाल र गंगालाल तुलाधरसहितको टोलीसँग भेट गरेकी हुन् ।
यसअघि उपाध्यक्ष सुमारको टोलीले एमाले अध्यक्ष केपी शर्मा ओलीसँग पनि भेट गरेको थियो । ४ दिने नेपाल भ्रमणमा आएकी सुमारले नेपाल आउनु अघि एमसीसी बारे नेपाल सरकारले पठाएको पत्रको जवाफ दिँदै एमसीसी कुनै सैन्य सम्झौता अन्तर्गत नपर्ने स्पष्ट पारेकी थिइन् । उनले एमसीसी सम्झौता इण्डो प्यासेफिकको हिस्सा नभएको समेत स्पष्ट पारेकी थिइन् ।
आजै बसेको सत्तारूढ पाँच दलीय गठबन्धनले मुलुकको पछिल्लो समसामयिक राजनीतिक अवस्थाबारे समीक्षा गरेको छ । बैठकमा
नेकपा (माओवादी केन्द्र) का अध्यक्ष पुष्पकमल दाहाल, नेकपा (एकीकृत समाजवादी) का अध्यक्ष माधवकुमार नेपाल र जनता समाजवादी पार्टी नेपाल (जसपा) का अध्यक्ष उपेन्द्र यादव लगायतको सहभागीता रहेको थियो ।
वि.सं.२०७८ भदौ २४ बिहीवार १९:५५ मा प्रकाशित
