Sansar News
काठमाडौं । नेकपा (एमाले)को केन्द्रीय कमिटी बैठक अघि स्थायी कमिटी बैठक बसेको छ । ललितपुरको च्यासलस्थित तुल्सीलाल स्मृति प्रतिष्ठानमा बैठक बसेको हो ।
बताइएअनुसार स्थायी कमिटी बैठक सकिएसँगै मात्रै केन्द्रीय कमिटी बैठक बस्नेछ ।
शुक्रबारदेखि जारी केन्द्रीय कमिटी बैठकमा उठेका प्रश्नहरुबारे आज पार्टी अध्यक्ष केपी शर्मा ओली, महासचिव ईश्वर पोखरेल र उपमहासचिव विष्णु पौडेलले जवाफ दिने कार्यक्रम छ । बैठकमा अध्यक्षको राजनीतिक प्रतिवेदन, महासचिवको सांगठनिक प्रतिवेदन र उपमहासचिवको विधान संशोधनसम्बन्धी प्रस्तावमाथि समूहगत छलफल भएको थियो ।
१० समूह बनाएर गरिएको छलफलका निष्कर्ष शनिबारको बैठकमा टोली नेताहरुले सुनाएका थिए । बैठकमा १० बुँदे सम्झौता र मधेशको सन्दर्भका केहि विवादहरु उठेका थिए ।
बताइएअनुसार तीनै नेताले जवाफ दिएपछि र अध्यक्षले सम्बोधन गरेपछि केन्द्रीय कमिटी बैठक सकिनेछ ।
वि.सं.२०७८ असोज १० आइतवार १२:५५ मा प्रकाशित
