हामी सबैकाे संसारन्यूज

निर्माण कम्पनी सन्तोषी नागार्जुन जेभी कन्स्ट्रक्सन प्रालिले ठेक्का सम्झौता गरी २०७१ साल जेठबाट पुल निर्माण कार्य सुरु गरेको हो । साढे ३७ मिटर लम्बाइ र साढे सात मिटर चौडाइ रहेको मोटरेवल पुल १८ महिनामा काम सम्पन्न गर्ने गरी निर्माण कम्पनीले जिम्मा लिए पनि अहिलेसम्म करिब ७५ प्रतिशत मात्र काम भएको छ ।

सडक डिभिजन कार्यालयको रु तीन करोडको लागतमा निर्माणाधीन यस मोटरेवल पुल २०७२ को मङ्सिरमै सम्पन्न गर्नुपर्ने योजना रहे पनि काममा ढिलासुस्तीका कारण पुनः २०७३ असार मसान्तसम्म सम्पन्न गर्ने गरी म्याद थपिए पनि सो समय अवधिभित्र पुल निर्माण सम्पन्न हुन सकेन । पुनः म्याद थप गरी २०७३ माघभित्र सम्पन्न गर्ने गरी काम अगाडि बढाए पनि पुल निर्माण पूरा हुन सकेन ।

निर्माण कम्पनीका ठेकेदार तेजप्रसाद बरालले पुल ढलानका लागि सडक डिभिजन कार्यालयले डिजाइन छनोट नगरेका कारण काम प्रभावित भएको बताउनुभयो । डिभिजन कार्यालयका प्राविधिकले यही फागुन १९ गते ढलानको डिजाइनका लागि अध्ययन अवलोकन गरेका छन् । एक हप्तापछि डिजाइनको रिपोर्ट आएपछि मात्र पुल ढलानको काम हुने ठेकेदार बरालले बताउनुभयो ।

यस खोलामा समयमा नै पुल निर्माण नहुँदा यातायात व्यवसायी, यात्रु र स्थानीयवासीले ठूलो समस्या भोग्दै आएका छन् । पुलकै नहुँदा बर्खायाममा रामपुरदेखि, भिमाद, दमौली, नारायणघाट, पोखरा, काठमाडौँसम्मका सवारी साधन बन्द हुने गर्दा आवतजावतमा समस्या परेको स्थानीय बासिन्दा रामप्रसाद श्रेष्ठ बताउनुहुन्छ ।