हामी सबैकाे संसारन्यूज

काठमाडौं । वायु सेवा संचालक संघले, संघका सदस्य वायुसेवा कम्पनीहरुको हेलिकप्टर चार्टर तथा रेस्क्यू उडानका लागि बुक गरी सेवा प्राप्त गरेका ट्राभल तथा ट्रेकिङ्ग ऐजेन्सीहरुले सेवा लिई लामो समयदेखि बक्यौता नतिरेको भन्दै कारबाही गर्ने चेतावनी दिएको छ ।

संघले बुधवार एक सूचना जारी गर्दै त्यस्ता केही एजेन्सीहरु, व्यक्ति तथा निकायले विगत लामो समयदेखि हेलिकप्टर कम्पनीहरुलाई बुझाउन बाँकी बक्यौता रकम नबुझाएकोले तीस दिनभित्र सम्पूर्ण बाँकी रकम बुझाउन आग्रह गर्दै अन्यथा कालो सूचीमा राखेर कारबाही अघि बढाउने चेतावनी समेत दिएको हो ।

‘यदि सो अवधिभित्र पनि कुनै ऐजेन्सीले फरफारक नगरी आलटाल गरेमा त्यस्ता ऐजेन्सीहरुसँग कारोबार रोक्का गर्ने, बैक तथा वित्तिय संस्थासँग समन्वय गरी कालो सूचीमा राख्ने प्रक्रिया अगाडि बढाउने, त्यस्ता निकायहरुको नाम सार्वजनिक गर्ने एवं त्यस्ता कार्यहरुबाट सिर्जित फौजदारी दायित्व समेतमा सि.आई.बी मार्फत् थप कारवाही चलाउने निर्णय गरेको हुँदा सम्बन्धीत सबै सरोकारवालाहरुलाई जानकारी गराउन यो सूचना प्रकाशित गरिएको छ ।’ संघद्धारा बुधवार जारी बिज्ञप्तिमा भनिएको छ ।