हामी सबैकाे संसारन्यूज

दिल्ली । भारतीय सेनाका पूर्व प्रमुख बिपिन रावतको हेलिकप्टर दुर्घटनामा परेर मृत्यु भएको पुष्टि भएको छ ।

भारतका पूर्वसेना प्रमुख तथा हालका चीफ अफ डिफेन्स स्टाफ रावत र उनकी श्रीमती मधुलिका रावतको तमिलनाडुको कुन्नुरमा स्थानीय समय अनुसार बुधवार दिउँसो १२ः२० मा भएको भारतीय सेनाको आईएएफ एमआई १७ भी ५ हेलिकप्टर दुर्घटनामा परेर मृत्यु भएको पुष्टि भारतीय एयरफोर्सले ट्विटरमार्फत् जानकारी दिएको छ ।

यसअघि गम्भीर रहेको भनिएको रावतलाई उपचारका लागि अस्पताल लगिएको भनिएपनि हाल उनको मृत्यु भएको पुष्टि गरिएको भारतीय समाचार एजेन्सीले जनाएका छन् ।

रावत दम्पत्तीसहित सेनाका १३ जनाको हेलिकप्टर दुर्घटनामा मृत्यु भएको पुष्टि भएको र एकजना गम्भीर घाईते भएको बताइएको छ । दुर्घटनामा मृत्यु हुनेमा रावत दम्पत्ती सहित ब्रिगेडियर एलएस लिड्डेर र लेप्टिनेन्ट कर्नेल हरजिन्दर सिंह तथा पीएसओहरू नायक गुर्सेवक सिंह, नायक जितेन्द्र कुमार, लेन्स नायक विवेक कुमार, लेन्स नायक एनके बी साइ तेजा र हाव सत्पाल रहेको बताइएको छ ।

रावत बुधवार बिहान तमिलनाडुको सुलुरस्थित सैन्य शिविरबाट विलिङटनस्थित स्टाफ कलेजमा तालिम लिइरहेका अफिसरहरुलाई सम्बोधन गर्न जाने क्रममा उक्त हेलिकप्टर दुर्घटनामा परेको थियो । बाक्लो हुस्सु लागेका कारण हेलिकप्टर दुर्घनामा परेको र त्यसमा आगो लागेकोले शबहरु ८५ प्रतिशत सम्म जलेको समाचार ऐजेन्सीहरुले जनाएका छन् ।

भारतीय प्रधानमन्त्री नरेन्द्र मोदी र रक्षामन्त्री राजनाथ सिंहले दुर्घटनामा परेर रावत लगायतको मृत्यु भएको भन्दै दुःख व्यक्त गरेका छन् । मन्त्री राजनाथ सिंहले रावतको मृत्युले देशलाई ठूलो क्षति पुगेको बताएका छन् ।

भारतमा रक्षा प्रमुख चढेको हेलिकप्टर दुर्घटना हुँदा ११ जनाको मृत्यु