हामी सबैकाे संसारन्यूज

काठमाडौं । त्रिभुवन विश्वविद्यालय कर्मचारी प्रशासन महाशाखाले आफ्ना कर्मचारीहरु विभिन्न राजनैतिक निर्वाचनमा उम्मेदवार बनेको भन्ने समाचारमा ध्यानाकर्षण भएको जनाएको छ ।

विश्वविद्यालयले विहिबार एक सूचना जारी गर्दै  विश्वविद्यालय सेवामा कार्यरत पदाधिकारी, शिक्षक वा कर्मचारीलाई राजनैतिक दलको कुनै पनि कार्यमा सहभागी वा संलग्न नहुन  यसअघि नै सूचित गरेकोमा यस्ता समाचार आउनु आपत्तिजनक भएको जनाएको छ ।

‘विश्वविद्यालयले आफ्नो शिक्षक कर्मचारी सेवासम्बन्धी नियम २०५०को नियम ६७मा राजनैतिक निर्वाचनमा उम्मेदवार बन्न नहुनेः शीर्षक अन्तर्गत शिक्षक वा कर्मचारीले कुनै पनि राजनीतिक दलको सदस्यता लिई वा नलिई राजनैतिक निर्वाचनमा उम्मेदवार बन्नु हुँदैन  र राष्ट्रिय वा स्थानीय तहको कुनै राजनैतिक निर्वाचनमा भाग लिन भाग लिन चाहेमा कार्यकारी परिषद्ले अन्यथा निर्णय गरेमा बाहेक उम्मेदवारीको मनोनयन दाखिला गर्नुभन्दा १५ दिन पूर्व नै विश्वविद्यालय सेवाबाट राजिनामा गर्नु पर्ने भन्ने व्यवस्थाको बारेमा बोध हुँदा हुँदै विश्वविद्यालयमा कार्यरत केही शिक्षक कर्मचारीहरु विगत केहि समय देखि विभिन्न राजनीतिक दलहरुको  विधान बमोजिम विभिन्न पदमा निर्वाचनका लागि उम्मेदवारको रुपमा खडा हुने, महाधिवेशन वा विधान अधिवेशनमा प्रतिनिधिको रुपमा भाग लिएको भनि विभिन्न पत्रपत्रिकाहरु र सामाजिक सञ्जालमा समेत समाचार प्रकाशित भएको प्रति विश्वविद्यालयको ध्यानाकर्षण भएको छ ।’

विश्वविद्यालय सेवामा कार्यरत पदाधिकारी, शिक्षक वा कर्मचारीलाई राजनैतिक दलको कुनै पनि कार्यमा सहभागी वा संलग्न नहुन सूचित गरेको छ । विश्वविद्यालयले त्यस्तो कार्यमा संलग्न भएको प्रमाणित भएमा त्रि.वि.नियम अनुसार विभागीय कारबाहीको प्रक्रिया अगाडि बढाउने सूचनामा उल्लेख गरेको छ ।