हामी सबैकाे संसारन्यूज

काठमाडौं । नेकपा (माओवादी केन्द्र)को महाधिवेशन स्थल प्रज्ञा प्रतिष्ठानमा राखिएको पार्टी अध्यक्ष पुष्पकमल दाहाल ‘प्रचण्ड’को पुत्ला हटाइएको छ । सहभागि प्रतिनिधि स्वंयले र सामाजिक सञ्जालमा व्यापक आलोचना भएपछि पुत्ला हटाइएको हो ।

माओवादी केन्द्रका नेता सुदन किरातीले उक्त पुत्ला हटाइएको जानकारी दिएका छन् । उनले चाकडी प्रवृत्तिका व्यक्तिले उक्त पुत्ला लगाएको समेत बताएका छन् ।

उनले लेखेका छन्, ‘नेतृत्वलाई थाहै नदिइ गरिएको चाकडी हटाइसकिएको सबैमा जानकारी ! चाकडी प्रवृत्ति- मूर्दावाद !’
महाधिवेशन स्थलमा राखिएको उक्त पुत्ला अगाडि आइतबार कार्यकर्ताहरुले सेल्फी खिचेका थिए । उनीहरुले सामाजिक सञ्जालमा प्रचण्डको पुत्लासहितको फोटो शेयर गरेका थिए । जसलाई निकै आलोचना पनि गरिएको थियो ।

नेकपा (एमाले)को विधान महाधिवेशनका क्रममा एमालेले त्यसैगरि पार्टी अध्यक्ष केपी शर्मा ओलीको पुत्लाहरु महाधिवेशन स्थलमा ठडाएको थियो । जसलाई कतिपयले ओलीको देवत्वकरण गरिएको भन्दै आलोचना पनि गरेका थिए । माओवादी नेताहरुले समेत उक्त कुराको सामाजिक सञ्जालमार्फत विरोध जनाएका थिए ।