Sansar News
काठमाडौं । नेकपा माओवादी केन्द्रको आठौं महाधिबेशन २३६ केन्द्रीय सदस्यको नामावली सार्वजनिक गर्दै आइतवार सम्पन्न भएको छ ।
पुष ११ गतेदेखि सुरु भएको आठौं महाधिवेशनको पुष १८ गतेको बन्दसत्रले माओवादी केन्द्रको आगामी नेतृत्वका लागि खुला तथा दलित, थारु, आदिवासी, जनजाति, मधेसी र मुस्लिम लगायतका कलस्टरबाट २३६ केन्द्रीय सदस्य चयन गरेको हो ।
यी केन्द्रीय सदस्यको नामावली आइतवारको बन्दसत्रमा सो पार्टीका अध्यक्ष पुष्पकमल दाहाल ‘प्रचण्ड’ ले पढेर सुनाएपछि हलले त्यसलाई अनुमोदन गरेको थियो ।
पदाधिकारीको टुंगो सोमबार बेलुकासम्म
आइतवारको बन्दसत्रबाट मनुमोदित भएका २३६ केन्द्रीय सदस्यको बैठकले आज माओवादीका १५ केन्द्रीय पदाधिकारीको चयन गर्ने भएको छ ।
पार्टीका नेता कृष्ण बहाद्र महराका अनुसार आज दिउँसो सानेपा हाइटस्थित हेरिटेज प्लाजामा सोमबार दिउँसो ३ बजे बस्ने केन्द्रीय समितिको बैठकले १५ पदाधिकारीको चयन गर्ने भएको हो ।
माओवादी केन्द्रको विधान अनुसार अध्यक्ष, १ वरिष्ठ उपाध्यक्ष, ६ उपाध्यक्ष, १ महासचिव, २ उपमहासचिव, ३ सचिव र एक कोषाध्यक्ष गरी १५ पदाधिकारी रहनेछन् ।
स्रोतका अनुसार केन्द्रीय सदस्य जस्तै पदाधिकारीको नाम पनि अध्यक्ष प्रचण्डले नै प्रस्ताव गर्ने सम्भावना रहेको छ । यदि त्यसो नभएमा निर्वाचन प्रक्रिया अपनाइनेछ ।
२३६ केन्द्रीय सदस्यको नाम पढ्दै माओवादीको आठौ महाधिवेशन सम्पन्न
वि.सं.२०७८ पुस १९ सोमवार १०:०४ मा प्रकाशित
