Sansar News
काठमाडौं । राष्ट्रिय सभाको निर्वाचनका लागि आज उम्मेदवारी दर्ता हुँदैछ ।
यहि माघ १२ गते राष्ट्रियसभाको १९ सदस्यका लागि हुने निर्वाचनका लागि आज विभिन्न दलले आ–आफ्नो उम्मेदवारी दर्ता गराउने भएका हुन् ।
आज बिहान १० देखि .दिउँसो ३ बजेसम्म उम्मेदवारहरुले सम्बन्धीत प्रदेशको निर्वाचन अधिकृतको कार्यालयमा पुगेर उम्मेदवारी मनोनयन दर्ता गराउन सक्नेछन् ।
निर्वाचन आयोगका अनुसार प्रदेश १ को विराटनगर, प्रदेश २ को जनकपुरधाम, बागमती प्रदेशको हेटौडा, गण्डकीको पोखरा,लुम्बिनीको घोराही, कर्णालीको वीरेन्द्रनगर र सुुदुरपश्चिमको धनगढीमा रहेको निर्वाचन आयोगको प्रदेश कार्यालयमा पुगेर उम्मेदवारहरुले मनोनयन दर्ता गराउन सक्नेछन् ।
निर्वाचनका लागि १२ वटा दल आयोगमा दर्ता भएका छन् । निर्वाचन आयोगले रिक्त १९ पदका लागि आगामी माघ १२ मा निर्वाचन गर्दैछ । निर्वाचनबाट महिला ७, दलित ३, अपाङ्गता भएका २ र अन्य ७ जना गरी १९ जना निर्वाचित हुनेछन् ।
मुख्य प्रतिस्प्रर्धा सत्तारुढ गठबन्धन र प्रतिपक्ष एमालेवीच
यहि माघ १२ गते हुने राष्ट्रियसभाको निर्वाचनमा सत्तारुढ गठबन्धनका दलहरु र प्रमुख प्रतिपक्षी एमालेबिच मुख्य प्रतिस्प्रर्धा हुने भएको छ ।
सोमबार बसेको सत्तारुढ सत्तारुढ गठबन्धनको बैठकले १९ सिटमा भागवण्डा टुंगो लगाएका छन् । गठबन्धनले राष्ट्रियसभामा जुन पार्टीको खाली भएको हो त्यही सिटमा उसैको उम्मेदवार उठ्ने सहमति गरेको बताइएको छ ।
जसमा एमालेको तर्फबाट रिक्त ८ सिटमा भने सहमतिमा भागवण्डा टुंगो लगाइएको छ । आठ सिटमा कांग्रेसले तीन, जसपाले २ र माओवादी र नेकपा (एस)ले एक÷एक सिट लिने सहमति बनेको छ ।
वि.सं.२०७८ पुस २० मंगलवार ०९:२१ मा प्रकाशित
