Sansar News
काठमाडौं । निर्वाचन आयोगले राष्ट्रिय प्रजातन्त्र पार्टी (राप्रपा) को विधानमा रहेको हिन्दुराष्ट्र हटाउन निर्देशन दिएको छ ।
यहि पुष १० गते राप्रपाले संशोधित विधान र केन्द्रीय कार्यसमितिको विवरण अद्यावधिक गरी निर्वाचन आयोगमा पेश गरेकोमा आयोगले विधानबाट हिन्दु राष्ट्र र राजसंस्था शब्द हटाउन भन्दै पत्र पठाएको हो ।
‘विधानको प्रस्तावनाको बुँदा ४ मा उल्लेखित ‘सनातन हिन्दुराष्ट्र एवं राजसंस्था प्रजातन्को मान्यता अभिवृद्दि गर्न र कायम गर्न’ भन्ने वांक्याश नेपालको संविधानको प्रस्तावना एवम् भावनाको प्रतिकूल देखिएकाले सो वांक्याशं हटाई नेपालको संविधानको धार २६९ तथा राजनीतिक दल सम्बन्धी ऐन, २०७३ अनुकूल हुने गरी उल्लेख गर्नुहुन’ आयोगद्धारा पठाइएको निर्देशनात्मक पत्रमा भनिएको छ ।
निर्वतमान अध्यक्ष थापाको आपत्ति
निर्वाचन आयोगले राप्रपाको विधानबाट “हिन्दुराष्ट्र र राजसंस्थासहितको प्रजातन्त्र“ शब्दावली तथा झण्डामा रहेको ’गाई’ हटाउन दिएको निर्देशनप्रति राप्रपाका निर्वतमान अध्यक्ष कमल थापाले आपत्ति जनाएका छन् ।
थापाले आयोगको निर्देशन संविधान र प्रजातान्त्रिक मान्यता विपरित रहेको र उक्त निर्णय आफुहरुलाई अस्विकार्य रहेको बताएका छन् ।
‘ विगतमा आयोगको यस्तै निर्णयलाई संघर्षबाट हामीले उल्टाएका थियौँ।२०७८ माघ २ गते आयोगले पठाएको पत्रवारे वर्तमान नेतृत्वले कुनै प्रतिक्रिया व्यक्त नगर्नु र सो पत्र अहिले सम्म लुकाएर राख्नु आश्चर्यजनक छ ।’ थापाले सामाजिक संजालमा लेखेका छन् ।
वि.सं.२०७८ माघ ९ आइतवार ०९:५० मा प्रकाशित
